"Newsweek"də Ermənistan və Azərbaycan arasında Vətən müharibəsindən sonra münasibətlərdən məqalə dərc edilib

Amerikanın məşhur Newsweek mətbu orqanında Azərbaycan Respublikasının ABŞ-dakı Səfiri Elin Süleymanovun Vətən müharibəsindən sonra Ermənistan və Azərbaycan arasında davamlı sülhün əldə edilməsinə həsr olunmuş məqaləsi dərc edilib.

Azərbaycan Respublikasının ABŞ-dakı Səfirliyindən Milli.Az-a verilən məlumata görə, məqalədə Cənubi Qafqaz regionunda münasibətlərin normallaşdırılması və iqtisadi inteqrasiyanın əldə edilməsi üçün imkanların əldən verilməməsindən bəhs edilir. Səfir Azərbaycanın beynəlxalq tanınmış ərazilərində Ermənistanın 30 il davam edən təcavüzü nəticəsində 1 milyona yaxın məcburi köçkünün öz torpaqlarından didərgin düşməsi və ərazinin ciddi dağıntılara məruz qalmasından bəhs edib. Bu təcavüz nəticəsində, həmçinin Ermənistanın təcrid vəziyyətinə düşməsi, xaricdən asılılıq, iqtisadi və demoqrafik tənəzzülə uğramasını xatırladıb.

Səfir müharibənin başa çatmasından sonra Ermənistan və erməni xalqı üçün yeni imkanlar yarandığını, təcavüzün emosional və iqtisadi fəlakətindən qurtarıb Azərbaycanlı qonşuları ilə sülh şəraitində yaşamağın mümkünlüyündən bəhs etmişdir. Bir neçə onillikdən sonra Ermənistan və Azərbaycanın yüksək səviyyəli məmurlarının regional əməkdaşlıq üçün nəqliyyat və kommunikasiya əlaqələrinin qurulmasını müzakirə etməsinə toxunan E.Süleymanov, hazırda demarkasiya işlərinin aparılmasına və məcburi köçkünlərin geri qayıtması istiqamətində səylərin göstərilməsinə diqqət çəkib.

Məqalədə ABŞ şirkətlərinin smart və yaşıl şəhərlərin qurulmasında iştirakının vacibliyi qeyd olunur və bu yolda maeənin mülki şəxslərin və hərbçilərin ölümünə səbəb olan minalanmış ərazilərin olmasını bildirilir. ATƏT-in Minsk Qrupunun həmsədri və BMT Təhlükəsizlik Şurasının üzvü qismində ABŞ-ın sülhün qorunub saxlanması istiqamətində sözügedən təşkilatların qərarlarına əməl edilməsinə maraq göstərilməsinin əhəmiyyəti qeyd olunur. ABŞ tərəf tutmadan hər iki ölkənin beynəlxalq hüquqa uyğun şəkildə davranması istiqamətində obyektiv vasitəçi rolunu tutmalıdır.

Məqalədə səfir E.Süleymanov xüsusi olaraq qeyd etmişdir ki, 1992-ci ildə yüzlərlə azərbaycanlının həyatını itirməsi ilə nəticələnmiş Xocalı qətliamı da daxil olmaqla keçmişin ağır yaraları hələ də sağalmamışdır. Eyni zamanda Azərbaycan gələcəyə baxmağa və sülhün təmin edilməsi üçün lazımi çətin addımları atmağa hazırdır. Azərbaycan Dağlıq Qarabağın erməni əsilli vətəndaşlarının ölkənin sosial və iqtisadi həyatına reinteqrasiyasını təmin etməklə bağlı mövqeyini bildirib.

Səfir müsəlman çoxluğa malik Azərbaycanın tolerantlıq və çoxmillətlilik nümunəsi olmasından bəhs etmiş, Ermənistan və Azərbaycan arasındakı münaqişəsinə dini don geyindirilməsini qınamış, bu kimi cəhdlərin barışığa ciddi ziyan vurduğunu qeyd edib.

Azərbaycan və Ermənistan arasında davamlı sülh regionun tam potensialını üzə çıxararaq, Ermənistana qonşuları ilə inteqrasiya etmək imkanları yaradacaqdır ki, bu imkanlar əldən verilməməlidir. Məqalənin original mətni ilə https://www.newsweek.com/seizing-opportunity-lasting-peace-between-armenia-azerbaijan-opinion-1570609 internet səhifəsindən tanış olmaq olar.

Milli.Az