09:12
Tovuzda itkin düşən məktəbli qız tapılıb.
Bu barə APA-nın yerli bürosuna Daxili İşlər Nazirliyinin (DİN) mətbuat xidmətinin Gəncə regional qrupunun baş inspektoru Eşqin Qasımov bildirib.
Onun sözlərinə görə Tovuz Rayon Polis Şöbəsinin əməkdaşlarının keçirdikləri müvafiq tədbirlər nəticəsində A. Süleymanovanın yeri Gəncə şəhərində müəyyən edilib və o Tovuz Rayonuna gətirilib.
Hazırda ailəsinə təhvil verilməsi gözlənilir.
22:00
2025.04.03
Tovuzda itkin düşən məktəbli qızı sonuncu dəfə Gəncədə görüblər.
Milli.Az "Unikal"a istinadla xəbər verir ki, itkin düşən 2012-ci il təvəllüdlü A.Süleymanova Gəncədə yerləşən xəstəxanaların birinin qarşısında avtobusdan düşüb. Məktəblini xəstəxananın xadimələrindən biri görüb.
Daxili İşlər Nazirliyinin Gəncə regional qrupunun baş inspektoru Eşqin Qasımov bildirib ki, hazırda şəxsin yerinin müəyyən edilməsi istiqamətində Tovuz Rayon Polis Şöbəsinin əməkdaşları tərəfindən axtarışlar davam etdirilir.
-----------
Tovuzun Bozalqanlı kəndində 13 yaşlı məktəblinin itkin düşməsi ilə bağlı bəzi detallar məlum olub.
7-ci sinif şagirdi olan yeniyetmə qızın məktəbdən çıxdıqdan sonra hara getdiyi məlum deyil.
Məktəblinin babası Zirəddin Süleymanov hadisə ilə bağlı Baku TV-yə açıqlama verib.
"Müəllim qızıma zəng edib deyib ki, son vaxtlar sözə baxmır, nəsə deyəndə eşitməzliyə vurur. Əlində yazılar və şpris tutmuşam. Müəllimlə danışmaq üçün məktəbə yollandıq, sonra isə nəvəm evə qayıtmaq adı ilə oradan uzaqlaşdı. Sonradan öyrəndik ki, çantasını sinif yoldaşına verib, qaçıb", - deyə o, bildirib.
Qeyd edək ki, yeniyetmənin valideynləri ayrılıb. Məktəbli və bacısı ata, nənə və babası ilə yaşayır.
---------
Tovuz rayonunun Bozalqanlı kəndindən olan 13 yaşlı qızın atası açıqlama verib.
Oxu.Az xəbər verir ki, Bizim.Media azyaşlının atası Elçin Süleymanovla əlaqə saxlayıb.
Ata bildirib ki, uşağın hara getməsi ilə bağlı heç bir ehtimalı yoxdur:
"Hara gedə bilər, heç bilmirəm. Heç bir məlumatımız, ehtimalımız yoxdur. Bir az əsəbi uşaqdır. Hətta onu psixoloq yanına da qoymuşduq. Qızım nənə-babası ilə yaşayır. Axırıncı dəfə Qəbələyə ekskursiyaya getmək üçün icazə istədi. Bundan əvvəl iki dəfə gəzintiyə getməsinə icazə vermişdik. Bu dəfə icazə vermədik. Dedik, qız uşağıdır, yol da uzaqdır. Yeganə ehtimal edirik ki, icazə vermədiyimiz üçün əsəbiləşib, çıxıb gedib. Dərsdən çıxanda anamla atam məktəbin qabağında olub, amma maşına minməyib, deyib özüm yavaş-yavaş gəlirəm. Elə oradan da çıxıb gedib".
Ata deyir ki, hazırda polis əməkdaşları və kənd camaatı uşağın axtarışındadır:
"Hara gedib, hansı səmtə üz tutub, bilən yoxdur. Nə rəfiqələri, nə yoldaşları hayana getdiyini bilmirlər. Bütün qohum-əqrəba, tanış-biliş, polis hamı axtarır. Hazırda kameradan hara getdiyinə baxırıq. Kamera göstərir ki, axşam saat 9-da Əlimərdanlı yolunda görünüb. Ümid edirəm izinə düşüb, tapa bilərik", - deyə ata əlavə edib.
----------
Xəbər verdiyimiz kimi, Tovuzda orta məktəb şagirdi, 13 yaşlı qız itkin düşüb. Rayonun Bozalqanlı kənd sakini, 2012-ci il təvəllüdlü A.Süleymanova ötən gün axşam saat 18:00 radələrində oxuduğu Bozalqanlı kənd tam orta məktəbindən çıxıb və evə qayıtmayıb.
Oxu.Az xəbər verir ki, Bizim.Media itkin düşən qızla bağlı bəzi təfərrüatları Tovuz rayonu Yusif Sadıqov adına Bozalqanlı kənd tam orta ümumtəhsil məktəbindən öyrənib.
Məktəbdən bildirilib ki, yeniyetmə travmalı və bir qədər problemli şagirddir. Dəfələrlə məktəb psixoloqu şagirdlə iş aparıb:
"İtkin düşən qız 7A sinfinin şagirdidir. Dünən sonuncu dərs saatından sonra gedib. Davamiyyəti hər zaman yaxşı olub, amma oxumağı zəif idi. Bir qədər sözə qulaq asan deyil. Davranışlarında pozğunluq var idi. Müəllimlərə cavab qaytarırdı, bir az çılğın şagird idi. Məktəb psixoloqu onunla məşğul olurdu. Yəni bir sözlə, travmalı uşaq idi".
Məktəb rəsmisinin sözlərinə görə, yeniyetmənin valideynləri boşanandan sonra qızın davranışlarında daha çox problem hiss olunub:
"Ana-ata boşanandan sonra qız ata babası, nənəsi və əmisi ilə qalırdı. Travmalı olsa da, özünü sevən qızdır. İnşallah sağ-salamat tapılar", - deyə məktəb rəsmisi əlavə edib.
Qeyd edək ki, Daxili İşlər Nazirliyi (DİN) Gəncə regional qrupunun baş inspektoru Eşqin Qasımov Bizim.Media-ya bildirib ki, hazırda şəxsin yerinin müəyyən edilməsi istiqamətində Tovuz RPŞ-nin əməkdaşları tərəfindən axtarışlar davam etdirilir.
----------
16:19
Tovuz rayonu Bozalqanlı kənd sakini 2012-ci il təvəllüdlü A.Süleymanova ötən gün 18 radələrində oxuduğu Bozalqanlı kənd tam orta məktəbindən çıxaraq itkin düşüb.
Məlumata görə, A.Süleymanova Bozalqanlı kənd tam orta məktəbinin şagirdidir.
Modern.az-a Tovuz rayon İcra Hakimiyyətinin Bozalqanlı kənd inzibati ərazi nümayəndəliyindən bildirilib ki, yeniyetmənin axtarışları davam etdirilir:
Bildirilib ki, yeniyetmə valideyn iclasındadan sonra məktəbdən ayrılıb və daha sonra ondan xəbər almaq mümkün olmayıb.
DİN Gəncə regional qrupunun baş inspektoru Eşqin Qasımov bildirib ki, hazırda şəxsin yerinin müəyyən edilməsi istiqamətində Tovuz RPŞ-nin əməkdaşları tərəfindən axtarışlar davam etdirilir.
Milli.Az