“Xəbər gəldi ki, başı pozulub” - Məktəbdəki hadisənin təfərrüatı - yenilənib

07:53

Xəbər verdiyimiz kimi, 26 yaşlı Əfsanə Rzayeva kəsici-deşici alətlə məktəbə gələrək övladını döyməyə cəhd edib və onu sakitləşdirmək istəyən müəllimə xəsarət yetirib.

Milli.Az-ın məlumatına görə, Ə. Rzayevanın qayınanası açıqlamasında bildirib ki, gəlininin səhhətində problemlər olub:

"Üç övladı var. 5 dəfə narkoz alıb. Başı travma alıb. Bir kurs müalicə etdik, bir az düzəlmişdi. Yoldaşı ilə mən işdə olmuşuq. Xəbər gəldi ki, başı pozulub. Anası ilə birgə Gəncə Xəstəxanasına apardıq. Müalicə olunacaq".

Qeyd edək ki, faktla bağlı araşdırma aparılır.

Ətraflı "Xəzər Xəbər"in süjetində:

------------
23:48

Aprelin 3-də Goranboy rayonu Hazırəhmədli kənd tam orta məktəbdə baş vermiş insidentlə bağlı hüquq-mühafizə orqanları tərəfindən araşdırma aparılır.

Milli.Az xəbər verir ki, bu barədə APA-ya Gəncə-Daşkəsən Regional Təhsil İdarəsindən məlumat verilib.

Bildirilib ki, 2-ci sinifdə oxuyan şagirdlərdən birinin valideyni məktəbə daxil olaraq övladını döyməyə və xəsarət yetirməyə cəhd edib. Sinif rəhbəri şagirdi qorumaq istəyən zaman valideyn müəllimə xəsarət yetirib. Dərhal məktəb rəhbərliyi tərəfindən təcili tibbi yardım xidmətinə və hüquq-mühafizə orqanlarına məlumat verilib. Müəllimə müvafiq tibbi yardım göstərilib. Şagirdin valideyninin uyğunsuz davranışı ilə bağlı hüquq-mühafizə orqanları tərəfindən araşdırma aparılır.

Qeyd edilib ki, şagirdin psixoloji durumu məktəb rəhbərliyi və idarə tərəfindən izlənilir. Təhsil müəssisəsinin psixoloqu tərəfindən profilaktik tədbirlərin həyata keçirilməsi üçün müvafiq tapşırıqlar verilib.

--------
16:06
Goranboyda qadın valideyn məktəbə hücum edib. 

Milli.Az xəbər verir ki, hadisə Hazırəhmədli kəndində qeydə alınıb. 

Kənd məktəbinə hücum edən qadın valideyn öz övladını döyüb, müəllimə isə xəsarət yetirib. 

Daxili İşlər Nazirliyinin Mətbuat Xidmətinin regional qrupun baş inspektoru Eşqin Qasımov Lent.az-a açıqlamasında bildirib ki, Goranboy Rayon Polis Şöbəsinə rayonun Hazırəhmədli kənd sakini olan bir nəfər qadın valideynin kəsici-deşici alətlə məktəbə gəlməsi, övladını döyməsi və onu sakitləşdirmək istəyən müəllimə xəsarət yetirməsi barədə məlumat daxil olub.

Polis əməkdaşları məktəbə gələrək müvafiq tədbirlər həyata keçirib.

Hadisəni törətməkdə şübhəli Ə. Rzayeva saxlanılıb, faktla bağlı araşdırmalar davam etdirilir.

Milli.Az