Siyasət

"Cəbhədə erməni təxribatlarının miqyası artacaq"

15 Sentyabr 2020 13:56
Baxış: 852

Təxribatların sayı artacaq. Çox güman ki, miqyası da artacaq.

Bunu Milli.Az-a açıqlamasında "Cənubi Qafqaz" politoloqlar klubunun rəhbəri İlqar Vəlizadə son iki gündə ermənilərin Tovuzla sərhəddə yenidən təxribat cəhdləri, aktivləşmələrini şərh edərkən deyib.

"Ermənistanın əsas məqsədi digər oyunçuların da diqqətini regionumuza cəlb etməkdir. Digər iştirakçıları deyəndə daha çox Rusiyanı nəzərdə tuturduq. Amma son olaylar onu göstərir ki, erməni rəhbərləri, xüsusilə də Nikol Paşinyanın tapşırığı ilə xarici işlər naziri canfəşanlıq göstərir. Deməli, o, Yunanıstanla, Kiprlə, indi də gedib Misirlə danışıqlar aparır. Onlara bu təxribatlar lazımdır. Bu təxribatlar onlara ona görə lazımdır ki, desinlər ki, baxın, Azərbaycan Ermənistan ərazisini atəşə tutur, orada müxtəlif aqressiv planlarını həyata keçirmək niyyətindədir, bizə dəstək verin.

Bu təxribatlardan xarici diplomatiyada öz məqsədləri üçün istifadə edirlər, özləri üçün belə bir fon yaradırlar ki, guya ki, Azərbaycan Ermənistana qarşı bu aqressiv planlarını həyata keçirməmək üçün onlara dəstək lazımdır. Rusiyanın silahlarının Ermənistana daşınması ilə bağlı müəmmalı məsələlər də çoxdur. Amma yəqin ki, bu dəstək ermənilərə kifayət etmir, onlar daha da böyük dəstək istəyirlər. Tovuz hadisələri göstərdi ki, ermənilərə real dəstək verənlər az idi. Onlar bu vəziyyəti dəyişdirmək istəyirlər və bu dəstəyi əldə etmək istəyirlər".

Qeyd edək ki, dünən Ermənistan silahlı qüvvələrinin bölmələri cəbhədə vəziyyəti yenidən gərginləşdirməyə cəhd ediblər. Belə ki, dünən Ermənistan Silahlı Qüvvələrinin bölmələri Tovuz rayonunun Əlibəyli kəndini atəşə tutub. Azərbaycan Ordusunun bölmələri tərəfindən dərhal həyata keçirilən cavab tədbirləri nəticəsində düşmən susdurulub. Sentyabrın 14-də axşam saatlarında Ermənistan tərəfi Ermənistan-Azərbaycan dövlət sərhədinin Tovuz rayonu Hacallı kəndi istiqamətində növbəti dəfə təxribat törədib. Azərbaycan ordusunun giziri Əliyev Renat Eldar oğlu yaralanıb. Hərbi qulluqçuya dərhal tibbi yardım göstərilib, onun həyatı üçün təhlükə yoxdur.

Təhməz Əsədov
Milli.Az

 

Azernews Newspaper

XƏBƏR LENTİ

Copyright © 2024 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.