Sağlamlıq

Həkim-travmatoloq: Piyada gəzinti dayaq-hərəkət sistemini və qan dövranını yaxşılaşdırır

11 Oktyabr 2021 23:45
0 Şərh     Baxış: 604

Gündəlik təkrarlanan yürüş yüngül idman növlərinə aiddir və sağlamlığın qorunmasında ciddi rola malikdir. Piyada yürüş bütün yaş qrupları üçün vacib hesab edilir. Orqanizmi tam sağlam və gəzintiyə əks-göstərişi olan xəstəliklərdən əziyyət çəkməyənlər sutkada ən azından 5-7 min addım atmalı, təxminən 5 kilometrə qədər piyada gəzməlidirlər. Bu, dayaq hərəkət sisteminin möhkəmlənməsi, əzələ kütləsinin artması, xüsusən oynaq ətrafı əzələlərin güclənməsi və oynaqların aktivləşməsi üçün çox vacibdir.

Milli.Az AZƏRTAC-a istinadən bildirir ki, həkim-travmatoloq Ramil Rzayev gündəlik gəzintinin orqanizm üçün faydalarından danışıb.

Həkim-mütəxəssis bildirib ki, hər gün piyada gəzmək imkanı olmayanlar heç olmasa periodik olaraq, günaşırı yürüş edə bilərlər: "Piyada gəzmək təkcə dayaq-hərəkət sistemini gücləndirmir, digər orqanların da funksiyasının zəifləməsinə mane olur. Nəzərə almaq lazımdır ki, günün istənilən vaxtında çıxıb gəzmək olmaz, yürüşün də öz zamanı və tərzi var. Yürüş üçün ən ideal vaxt yeməkdən ya 1,5-2 saat əvvəl, ya da sonradır".

R.Rzayev, həmçinin yürüşün templəri barədə də danışıb. Qeyd edib ki, yürüşün yavaş, orta, sürətli və çox sürətli templəri var: "Yavaş yürüş çox da faydalı hesab edilmir, çünki bu, əzələ kütləsinin toplanmasına və qan dövranının yaxşılaşmasına çox da təsir göstərmir. Lakin saatda 3-4 kilometr olmaqla tətbiq edilən orta templi yürüş olduqca faydalıdır. Sürətli və çox sürətli templi piyada gəzinti isə sağlam orqanizmlər üçün nəzərdə tutulub. Ona görə də yürüş tempi fərdi qaydada təyin edilməlidir və təyinat həmin şəxsin fiziki vəziyyətinə əsasən aparılmalıdır".

Həkim-travmatoloqun dediyinə görə, yürüş edərkən geyim, xüsusilə ayaqqabını düzgün seçmək lazımdır: "Düzgün seçilməyən ayaqqabı ilə uzun müddət yerimək faydadan çox zərər verə bilər. Bu, xüsusən yastıpəncəlilər üçün daha zərərlidir. Yürüş ayaqqabısı rahat, yüngül və ortopedik içlikli olmalıdır. Onu da qeyd etmək lazımdır ki, piyada gəzmək, həmçinin qan dövranını da yaxşılaşdırdığı üçün stresi azaltmağa kömək edir".

Milli.Az

35 000 AZN-dək krediti ONLAYN sifariş et!

Şərh yaz:

0 Şərh:

XƏBƏR LENTİ

Copyright © 2019 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.