Cəmiyyət

Sumqayıtda nömrələnmiş ağacların sirri açıldı - FOTO

12 Mart 2015 00:10
0 Şərh     Baxış: 3 751
VTB-də minimal faiz dərəcəsi ilə nağd kredit 9.9%-dən
#FOTOREPORTAJLAR #CƏMİYYƏT
Bir neçə gün öncə Milli.Az saytında "Sumqayıtlılardan şəhəri qorumaq üçün kövrək addım" başlıqlı yazı getmişdi

Xəbərdə bildirilirdi ki, Sumqayıtın Kotec adlanan ərazisində, Mehdi Hüseynzadə və Qorki küçələrinin kəsişdiyi yerdə sakinlər ağacların hamısını işarələyib və sayını qeyd ediblər. Hər bir ağacın üzərinə nömrə qoyublar. Ağaclığın içindəki metal lövhəyə isə "Parka dəymə! Bu park uşaqlarındır!" sözlərini də yazıblar. Sakinlər qeydləri etdikləri tarixi də yazıblar. Həmin yazılar bu ilin fevral ayının 16-da yazılıb.

Sakinlərin belə addım atmaları səbəbsiz deyil. Bir neçə gün əvvəl 3-4 nəfər gəlib bu ərazidə ölçü-biçi aparıblar. Həmin şəxslərin yanında icra hakimiyyətində çalışan vəzifəli şəxs də olub. Odur ki, sakinlər onların nəfəslərini kəsməyə çalışan yaşıllıq qənimlərinə qarşı bu cür mübarizə üsulu seçiblər. Ağacları son zamanlar qiymətə minən dollar sevdalılarından qorumaq üçün sona qədər dirənəcəklərini deyirlər.

Milli.Az olaraq, doğrudan da, narahatçılıq üçün əsasın olub-olmadığını araşdırmağa çalışdıq. Ekologiya və Təbii Sərvətlər Nazirliyinin mətbuat katibi İradə İbrahimova ilə əlaqə saxladıq.

Qurum rəsmisinin sözlərinə görə, nazirliyin müvafiq qurumunun əməkdaşları Sumqayıt şəhərində həmin hadisəni araşdırıblar. Məlum olub ki, Mehdi Hüseynzadə və Qorki küçələrinin kəsişdiyi yerdə ağaclar üçün təhlükə yoxdur. Şəhər İcra Hakimiyyətindən nazirliyə bildiriblər ki, həmin ərazidə abadlıq işləri görülməsi nəzərdə tutulub. Ona görə, də icra hakimiyyətinin nümayəndələri həmin əraziyə baxış keçiriblər. Həmin şəxslərin ərazidə görünməsi və ölçü-biçi işləri aparması sakinlərin narahatçılığına səbəb olub.

İradə İbrahimova bildirib ki, qeyd olunan ərazi nazirliyin nəzarətinə götürülüb. Orada ağacların kəsilməməsi üçün lazımi tədbirlər görülüb.

Teymur Hacıyev
Milli.Az

Böyütmək üçün şəkillərə klikləyin.

Milli.Az - Xəbər Portalı
Azernews Newspaper

DİGƏR XƏBƏRLƏR

XƏBƏR LENTİ

Copyright © 2026 Milli.Az

Saytdakı materialların istifadəsi zamanı istinad edilməsi vacibdir. Məlumat
internet səhifələrində istifadə edildikdə hiperlink vasitəsi ilə istinad mütləqdir.