“Bakı Tikiş Evi”nin məktəbli geyimlərinə sertifikat verildi

Bu barədə Milli.Az xəbər portalına Standartlaşdırma, Metrologiya və Patent üzrə Dövlət Komitəsindən məlumat daxil olub.

Bildirilib ki, Bakı şəhərində kütləvi olaraq məktəbli geyimləri istehsalı ilə məşğul olan "Bakı Tikiş Evi" ASC öz məhsullarını Milli Sertifikatlaşdırma Sistemində sertifikatlaşdırmaq məqsədilə Azərbaycan Respublikasının Standartlaşdırma, Metrologiya və Patent üzrə Dövlət Komitəsinə müraciət etmişdir. Müraciət əsasında müəssisədə istehsal olunan məktəbli paltarlarından (oğlanlar üçün göy rəngli parçadan gödəkcə və şalvar, qızlar üçün göy rəngli parçadan pencək və damalı parçadan yubka) və məktəbli paltarları üçün astarlıq parçadan nümunə götürülərək komitənin Təcrübə-Sınaq Mərkəzinin (AzTEST) yüngül sənaye məhsullarının sınaq laboratoriyasına təqdim edilmişdir.

Sınaqlar cari ilin 22-30 sentyabr tarixlərində həyata keçirilmişdir. Sınaqlar nəticəsində nümunələrin yoxlanılmış göstəricilərinə görə ГОСТ 25295-2003 standartının tələblərinə cavab verdiyi müəyyən olunmuşdur. Sınaq protokolları əsasında Standartlaşdırma, Metrologiya və Patent üzrə Dövlət Komitəsinin 1 saylı Ərazi Sınaq və Sertifikatlaşdırma İdarəsi "Bakı Tikiş Evi" ASC-nin istehsal etdiyi "məktəbli oğlanlar üçün kostyum (gödəkcə və şalvar)" və "məktəbli qızlar üçün kostyum (pencək və yubka)" məhsullarına uyğunluq sertifikatlarının verilməsi barədə qərar qəbul etmişdir. Müəssisə 1 oktyabr 2010-cu il tarixindən uyğunluq sertifikatları ilə təmin edilmişdir.

Bundan başqa "Bakı Tikiş Evi" ASC tərəfindən "BTE" loqotipinin əmtəə nişanı kimi qeydiyyatı ilə bağlı Standartlaşdırma, Metrologiya və Patent üzrə Dövlət Komitəsinə iddia ərizəsi daxil olmuşdur. Hazırda qeydiyyatla bağlı məsələlər ekspertiza mərhələsindədir. Ekspertizanın rəyi yaxın günlərdə məlum olacaq.

Xatırladaq ki, "Bakı Tikiş Evi" ASC-nin istehsal etdiyi məktəbli formalarının nəhayət, Dövlət Komitəsi tərəfindən qənaətbəxş qiymətləndirilməsi və sertifikat veriləcəyi barədə Milli.Az xəbər portalı məqalə dərc etmişdi. 

Milli.Az

Uyğun linklər:

Məktəbli geyimi mübahisələrinə son: formanın keyfiyyətində razılığa gəlindi!

"Bakı Tikiş Evi"ndə istehsal olunan məktəbli geyimləri üzrə yoxlamaların ilkin nəticələri açıqlanıb

Təhsil İdarəsi: Məktəbli geyimlərinin yalnız "Bakı Tikiş" ASC-nin istehsalı olması barədə heç bir rəsmi göstəriş verilməyib

"Bakı Tikiş"in tikdiyi məktəbli geyimlərinin modelləri oğurlanaraq Çində hazırlanır

Dövlət Komitəsi: "Bakı Tikiş Fabriki sertifikatsız məktəbli geyimi istehsal edir"