Cəmiyyət

Corat bağlarında nə baş verir? - "Heç kim həyətində rahat otura bilmir"

30 May 2025 17:41

Baxış: 5 223

VTB-də minimal faiz dərəcəsi ilə nağd kredit 10.49%-dən

#CƏMİYYƏT

Sumqayıtın Corat bağları adlanan ərazisində kanalizasiya sistemindəki nasazlıqlar, su təchizatındakı çatışmazlıqlar və yararsız yollar sakinlərin gündəlik həyatını ağırlaşdırır. Kanalizasiya xətlərində yaranan problemlər səbəbindən çirkab sular küçələrə axır və ətrafa pis qoxu yayılır.

Milli.Az xəbər verir ki, sakinlər bildirirlər ki, müvafiq qurumlara dəfələrlə müraciət etmələrinə baxmayaraq, problemlər yalnız müvəqqəti həll olunur və qısa müddət sonra vəziyyət yenidən pisləşir:

"Heç kim həyətində rahat otura bilmir, qonaqlar da gəlmir, hamı vəziyyətdən narazıdır".

Bundan əlavə, sakinlərin sözlərinə görə, axşam saat 21:00-dan sonra əraziyə marşrut avtobusları gəlmir ki, bu da onların nəqliyyat problemlərini artırır.

Məsələ ilə bağlı Sumqayıt Bələdiyyəsinin mətbuat katibi Səbuhi Elnur bildirib ki, hazırda asfaltlama işləri aparılmasa da, gələcək sosial planlarda bu məsələlər nəzərə alınacaq.

AYNA-nın mətbuat katibi Tural Orucov isə qeyd edib ki, Corat Bağları ilə 76-cı məhəlləni birləşdirən 33 nömrəli marşrut xətti üzrə 10 avtobus fəaliyyət göstərir və avtobuslar səhər 06:00-dan 22:00-dək hərəkət edir. Sonuncu avtobus saat 21:20-də dayanacaqdan yola çıxır.

İri Şəhərlərin Birləşmiş Su Təchizatı Xidmətindən verilən məlumata görə, ərazidə tullantı su xəttində tutulma yaranıb və rayon sukanal idarəsinin qəza briqadası şəbəkənin fəaliyyətini bərpa edib. Lakin sakinlər hələ də çirkab sularının yayılmasından şikayətçidirlər.

Asya
Milli.Az