"Ford" bu avtomobilləri geri çağırır

"Ford" arxa görüntü kameralarındakı nasazlığa görə ABŞ-da 1.1 milyon avtomobili geri çağırır

Milli.Az xəbər verir ki, amerikalı avtomobil nəhəngi "Ford" arxa görüntü kameralarında aşkarlanan texniki nasazlıq səbəbilə ABŞ ərazisində 1.1 milyona yaxın avtomobili geri çağırmaq qərarına gəlib.  

Məlumata əsasən, sözügedən nasazlıq kameraların proqram təminatı ilə bağlıdır. Belə ki, proqramdakı səhv səbəbindən geri ötürücü kamerada görüntü ya tamamilə itə bilər, ya da səhv şəkildə əks oluna bilər. Bu da sürücünün arxa sahədəki vəziyyəti düzgün dəyərləndirə bilməməsi ilə nəticələnir ki, bu da qəza riskini ciddi şəkildə artırır. ABŞ-ın Yol Hərəkəti Təhlükəsizliyi İdarəsi (NHTSA) bu problemi potensial təhlükə kimi qiymətləndirib.

Geri çağırılma kampaniyası 2021-2024-cü illər arasında istehsal olunan "Bronco", "F-150", "Edge" modellərini, eyni zamanda 2023-2024-cü illərdə buraxılan "Escape", "Corsair", "F-250", "F-350", "F-450", "F-550" və "F-600" modellərini əhatə edir. Bu modellərdən bəziləri həm şəhərdaxili istifadə, həm də yükdaşıma və ağır iş şəraitinə uyğun olaraq geniş şəkildə istifadə olunur.

"Ford" şirkətindən bildirilib ki, problemi aradan qaldırmaq üçün müştərilərə pulsuz proqram yenilənməsi təklif olunacaq. Avtomobil sahibləri yaxınlıqdakı rəsmi texniki xidmət mərkəzlərinə müraciət etməklə proqram təminatını yeniləyə bilərlər.

Qeyd edək ki, bu, son illərdə "Ford"un proqram təminatı ilə bağlı həyata keçirdiyi ilk genişmiqyaslı geri çağırma deyil. Ekspertlər hesab edir ki, avtomobillərdə elektron sistemlərin və proqram təminatının rolunun artması ilə bu kimi halların gələcəkdə də davam etməsi mümkündür. Eyni zamanda bu hadisə avtomobil istehsalçılarının təhlükəsizlik sistemlərinə nə qədər ciddi yanaşmalı olduğunu bir daha gündəmə gətirir.

Asya
Milli.Az