"Allah haqqı, itin zülmünü çəkirik"

Biləsuvar rayonunun Əhmədağa Muğanlı küçəsində yaşayan sakinlər uzun illərdir davam edən içməli su problemi ilə üzləşiblər.

Milli.Az xəbər verir ki, yerli əhali aidiyyəti qurumlardan kömək gözlədiklərini, lakin məsələnin hələ də köklü şəkildə həll olunmadığını bildirir.

Sakinlərdən biri vəziyyətin nə qədər ağır olduğunu belə ifadə edib:

"Suyumuz yoxdur, quru səhrada su deyib mələyirik. Məcbur qalıb bataqlıqdan su götürürük. Allah haqqı, itin zülmünü çəkirik". 

Onların sözlərinə görə, suyun olmaması təkcə gündəlik məişət işlərini deyil, həm də sağlamlıqlarını ciddi şəkildə təhlükə altına atır. Xüsusilə yay aylarında vəziyyət daha da dözülməz hal alır.

Məsələ ilə bağlı Biləsuvar Su Meliorasiya Sistemlərinin İstismarı İdarəsi açıqlama verib. Qurumdan bildirilib ki, Əhmədağa Muğanlı küçəsi rayonun sonradan salınmış yaşayış sahələrindən biridir. Su-kanalizasiya sistemi layihələndirilərkən bu ərazidə yaşayış nəzərdə tutulmadığından, adıçəkilən küçə həmin layihəyə daxil edilməyib.

Sonradan yaranan tələbat və sakinlərin çoxsaylı müraciətlərindən sonra Biləsuvar Rayon İcra Hakimiyyəti tərəfindən məsələ  İri Şəhərlərin Birləşmiş Su Təchizatı Xidmətinə çatdırılıb. İcazə alındıqdan sonra əhali şəxsi vəsaiti hesabına müvəqqəti su xətti çəkdirib. Lakin bu sistem rəsmi layihədə nəzərdə tutulmadığı üçün sayğacların quraşdırılması və davamlı texniki xidmət məsələləri mümkün olmayıb.

Qurumun verdiyi son məlumata əsasən, hazırda problemin daimi şəkildə həlli üçün aidiyyəti dövlət qurumları tərəfindən əlavə işlər görülür və bu istiqamətdə planlaşdırılmış addımlar atılmaqdadır.

Sakinlər isə vəziyyətin daha da uzanmasından narahatdır və rəsmi qurumların məsələni təxirə salmadan tam həll edəcəyinə ümid edirlər. Çünki bu cür su çatışmazlığı yalnız sosial narahatlıq deyil, eyni zamanda ciddi sanitariya və sağlamlıq riskləri də yaradır.

Asya
Milli.Az