Atası da mina qurbanı olub... - Yenilənib - FOTO

Xəbər verdiyimiz kimi, Tərtər Rayon Yuxarı Qaradağlı kənd sakini Hüseynov Telman Əhməd oğlu ərazidə mal-qara otararkən minaya düşüb. Hadisə nəticəsində o, bir ayağını itirib.

Milli.Az APA-ya istinadən xəbər verir ki, Telman Hüseynovun atası da mina qurbanı olub.

Belə ki, T. Hüseynovun atası Əhməd Hüseynov 1992-ci il 16 iyun tarixində Ağdərə rayonunun Qızıloba kəndi ərazisində mal-qara otaranda minaya düşərək həlak olub.

-------------------

2025.05.30

Ağdərədə minaya düşən şəxs ixtisaslı tibbi yardımın göstərilməsi üçün Bərdə Rayon Mərkəzi Xəstəxanasına təxliyə olunub.

Trend-in yerli müxbirinin xəbərinə görə, pasiyentin sağ aşıq baldırının travmatik amputasiyası əməliyyatı icra olunub.

Hazırda vəziyyəti ağır olaraq qiymətləndirilir.

-----------
21:24

Mayın 30-da Tərtər rayonunun Qızıloba kəndi ərazisində mina hadisəsi baş verib.

Bu barədə Azərbaycan Respublikası Daxili İşlər Nazirliyi, Baş Prokurorluğu və Minatəmizləmə Agentliyinin (ANAMA) Mətbuat Xidmətləri məlumat yayıb.

Bildirilib ki, Tərtər rayonu, Yuxarı Qaradağlı kənd sakini 1978-ci il təvəllüdlü Hüseynov Telman Əhməd oğlu keçmiş təmas xəttiində minalardan təmizlənməmiş Qızıloba kəndi ərazisində heyvan otararkən piyada əleyhinə mina partlayışı nəticəsində sağ ayağından xəsarət alıb. Xəsarət alan şəxs sağ ayağın pəncə hissəsinin cırılmış dağılmış yarası diaqnozu ilə xəstəxanaya yerləşdirilib.

Faktla bağlı Tərtər rayon prokurorluğunda araşdırma aparılır.

ANAMA, Daxili İşlər Nazirliyi və Baş Prokurorluq bir daha vətəndaşları təhlükəsizlik qaydalarına riayət etməyə, mina təhlükəsi işarələrinin göstəricilərinə diqqətlə yanaşmağa və bələd olmadıqları ərazilərə daxil olmamağa çağırır!

------------
20:54

30.05.2025-ci il saat 19:30 radələrində Tərtər rayonu Qaradağlı kəndi ərazisində minaya düşmə səbəbilə xəsarət alan 1 nəfər (kişi cinsli) Tərtər Rayon Mərkəzi Xəstəxanasına hospitalizasiya olunub.

Bu barədə TƏBİB-dən məlumat verilib.

Bildirilir ki, 1978-ci il təvəllüdlü şəxsə sağ ayağın pəncə nahiyəsinin parçalanmış, didilmiş yarası diaqnozu təyin edilib.

"Hazırda müalicəsi Təcili tibbi yardım şöbəsində davam etdirilir. Vəziyyəti ağır olaraq qiymətləndirilir", - qurumdan qeyd olunub.

-------------
20:11

Minaya düşən şəxs hadisə yerindən təxliyə olunaraq aidiyyəti üzrə təhvil verilib.

APA xəbər verir ki, o, Bərdə Rayon Mərkəzi Xəstəxanasına aparılır.

Faktla bağlı araşdırma aparılır.

-------------
19:50

Ağdərə ərazisində mülki şəxs minaya düşüb.

Milli.Az Trend-ə istinadən xəbər verir ki, hadisə rayonun Qırmızı kənd ərazisində baş verib.

Belə ki, Tərtər Rayon Yuxarı Qaradağlı kənd sakini Hüseynov Telman Əhməd oğlu ərazidə mal - qara otararkən minaya düşüb.

1978-ci il təvəllüdlü Telman Hüseynov Bərdə rayon mərkəzi xəsdəxanasına yerləşdirilib. Ayağının birin itirib.
 

Milli.Az