Sağlamlıq

Alimlər ömrü uzatmağın yolunu tapdı - İki dərmandan ibarət kokteyl...

30 May 2025 11:52

Baxış: 1 799

VTB-də minimal faiz dərəcəsi ilə nağd kredit 9.9%-dən

#CƏMİYYƏT #SAĞLAMLIQ #ARAŞDIRMA #HEYVANLAR

Alimlər ömrü uzatmağın yolunu tapıblar.

Milli.Az xarici mətbuata istinadla xəbər verir ki, bu barədə məlumat "Nature Aging" jurnalında dərc olunub.

Avropada aparılan araşdırma nəticəsində məlum olub ki, iki dərmandan ibarət "yaşlanma əleyhinə kokteyl" siçanlarda ömrü 30 faiz artırır.

Almaniyadakı Max Plank Yaşlanma Biologiyası İnstitutunda aparılan araşdırma zamanı iki dərmanın birləşməsindən yaradılan qarışığın siçanlarda həyat müddətini əhəmiyyətli dərəcədə uzatdığı məlum olub.

Tədqiqat nəticəsində yalnız rapamisin verilən siçanların ömrü 17-18 faiz, yalnız trametinib verilənlərin ömrü isə 7-16 faiz artıb. Hər iki dərmanın birlikdə tətbiqi isə ömrü 26-35 faiz uzadıb. Araşdırma zamanı bu kokteyli qəbul edən siçanlarda qaraciyər və dalaqda şişlərin gec meydana çıxdığı, beyin, böyrək və əzələlərdə iltihabın azaldığı, ürək funksiyalarının daha ləng pozulduğu müşahidə edilib. Həmçinin bu siçanların yaşlandıqdan sonra daha aktiv qaldığı və daha az çəki aldığı bildirilib.

Məlumata görə dişi siçanların orta ömür müddəti 34,9 faiz, erkəklərdə isə 27,4 faiz artıb. Ən uzun yaşama müddəti isə müvafiq olaraq 32,4 və 26,1 faiz uzanıb.

Alimlər bildiriblər ki, bu iki dərman bədəndəki Ras/İnsulin/TOR siqnal yoluna təsir göstərir və birlikdə istifadə olunduqda daha güclü nəticə verir. Maraqlıdır ki, dərmanların istifadəsi zamanı əlavə hər hansı yan təsir qeydə alınmayıb.

Araşdırmanın müəllifi genetik Prof. Linda Partridge bu nəticələrin insanlarda tam eyni təsiri göstərməyəcəyini desə də, sağlam qocalıq dövrünü uzatmaq baxımından mühüm addım olduğunu qeyd edib. Hər iki dərman artıq Avropa və ABŞ-da təsdiq olunduğundan, insanlarda klinik sınaqlara yaxın vaxtlarda başlanacağı gözlənilir.

İsmayıl
Milli.Az