"Çox qısa bir müddətdə erməni barbarlarının dağıtdığı bölgələrimizi bərpa edəcəyik"

Prezident İlham Əliyev Bakıda İtaliyanın Parlament rəhbərliyini qəbul edərkən "Azərbaycanda müharibədən sonra bərpa dövrü başlayır" sözlərini deməklə, əslində, müharibədən sonra Azərbaycanın qarşısında dayanan əsas strateji xəttin mahiyyətini xaricdən gəlmiş mötəbər qonaqlara çatdırıb.

Bunu Milli.Az-a açıqlamasında "Bakı xəbər" qəzetinin baş redaktoru, siyasi ekspert Aydın Quliyev deyib.

Ekspert bildirib ki, Azərbaycanın özünə dost hesab etdiyi ölkələrlə əməkdaşlığa getməkdə çox böyük marağı var:

"Bir daha bütün dünya gördü ki, Azərbaycan müharibəni, həqiqətən, qalibiyyətlə başa çatdırandan sona ölkənin bərpa işlərinin həyata keçirilməsi və işğaldan azad ediliş rayonlarımızın sosial, iqtisadi vəiyyətinin Azərbaycanın əsas və digər hissəsi ilə tam sinxronlaşdırılması, bərabərləşdirilməsi vəzifəsini qarşıya qoyur. Bu strategiyanın əcnəbi qonaqlara, İtaliya deputatlarına rəsmi qaydada bəyan edilməsi bir sıra maraqlı nəticələr çıxartmağa əsas verir.

Əvvəla, Azərbaycan Prezidenti bununla xarici qonaqlara və İtaliya kimi Azərbaycan üçün çox əhəmiyyətli bir tərəfdaş ölkənin təmsilçilərinə, ilk öncə, demək istədi ki, Azərbaycanın bu məsələdə özünə dost hesab etdiyi ölkələrlə əməkdaşlığa getməkdə çox böyük marağı var. O cümlədən də İtaliya şirkətlərinin, İtaliya dövlətinin bu işlərdə yaxından iştirakını istəyir. Prezidentin italiyalı deputatlarla apardığı söhbət bir daha sübut etdi ki, Azərbaycan çox qısa bir müddətdə erməni barbarlarının dağıtdığı bölgələrimizi əsas sosial, iqtisadi parametrlər nöqteyi nəzərindən Azərbaycanın əsas inkişaf bölgələrinə yaxınlaşdırmağa iddialıdır və buna da imkanları var".

A.Quliyev qeyd edib ki, prezidentin bu görüşdəki çıxışı ölkəmizin müharibədən sonrakı əsas strategiyasını rəsmən bəyan etmək baxımından əhamiyyətlidir:

"Prezidentin italiyalı deputatlarla söhbətdə "Biz dost ölkələri bu məsələdə ilk əvvəl yanımızda görmək istəyirik" deməklə, həqiqətən, Azərbaycana kömək olan, dəstək olan ölkələrə maraqlı bir mesaj vermiş oldu ki, necə ki, Azərbaycan çətin müharibə anlarında özünə dost hesab etdiyi ölkələri yanında gördü, onların köməyindən istifadə etdi, eləcə də müharibədən sonrakı bərpa işlərində də Azərbaycana dost ölkələri öz yanında və ölkəmizin iqtisadiyyatının əsas iştirakçı tərəfləri kimi görmək istəyir.

Bir sözlə, prezidentin bu görüşdəki çıxışı həm ölkəmizin müharibədən sonrakı əsas strategiyasını rəsmən bəyan etmək baxımından əhəmiyyətlidir, həm ölkəmizin özünün bu bölgələrdə lazım olan səviyyədə bərpa-təmir işləri aparmaq üçün gücünün yetərli olduğunu göstərmək baxımından əhəmiyyətlidir, həm də açığı Azərbaycan bu işdə də yalnız Azərbaycana dost olan ölkələrlə əməkdaşlıq etməkdə maraqlı olduğunu bir daha nümayiş etdirdi. Bunlar növbəti mərhələ üçün Azərbaycanın rəsmi strategiyasının çox mühim istiqamətləri kimi əhəmiyyətlidir və dünya dövlətlərinə bir mesajdır".

Təhməz Əsədov
Milli.Az