Fransada seçkilərdə Makron öndədir, amma...

Bu gün Fransada prezident seçkilərinin birinci turu keçirilib.

Fransada və onun Qərb yarımkürəsindəki departamentlərində 70 minə yaxın seçki məntəqəsi açılıb. Milli Statistika və İqtisadi Tədqiqatlar İnstitutunun məlumatına görə, seçici siyahılarında 48 milyondan çox seçici qeydə alınıb.

Milli.Az bildirir ki, seçkilərdə Fransanın hazırkı prezidenti Emmanuel Makron da daxil olmaqla 12 namizəd iştirak edir. Onun əsas rəqibi "Milli Assosiasiya"nın namizədi, deputat Marine Le Pendir.

Fransada seçkilərin ilkin nəticələrinin ekzit-pol sonuclarına görə, Emmanuel Makron səslərin 27,5 faizi ilə liderdir. Mari Le-Pen 22 faiz səs toplayıb.

Jan-Lyuk Melanşon 15,7 faizlik nəticə ilə üçüncü yerdədir.

Erik Zemmur və Valeri Pekres isə 10 faizlik barajı keçə bilməyiblər.

Seçkilərin 2-ci turunda çox yəqin Melanşon səslərini Makrona verəcək.

Fransa seçiciləri ölkə prezidentliyinə 12 namizəddən birinə səs verirlər.

Ölkənin 49 milyondan çox vətəndaşının səsvermə hüququ var.

Fransada indi inflyasiyanın illik səviyyəsi 4,56 faizə çatıb. İlk baxışdan kiçik rəqəm təsiri bağışlaya bilər, amma 37 ildən bəri Fransada ən yüksək həddir və üstəlik, proqnozlardan da artıqdır.

İnflyasiyanın yaxın zamanlarda səngiyəcəyini deyənlər çox azdır.

Fransa iqtisadiyyatındakı vəziyyəti rəqəmlərdən daha çox nəqliyyatda çalışanların etiraz aksiyaları səciyyələndirir.

Çünki avtomobil, bəlli, benzin tələb edir. İki gündən bir bakı benzinlə doldurmaq isə 140 avroya başa gəlir ki, bu da az pul deyil.

Bu prezident seçkilərində kimin qalib gəlməsindən asılı olmayaraq o, Ukraynadakı situasiyadan asılı olacaq. Yəni ya Avropa İttifaqının təmərküzləşdirilən mövqeyini dəstəkləməli, ya da ABŞ-ın göstərişlərini yerinə yetirməlidir.

Emmanuel Makronun indiyədək ifa etdiyi ikili oyun daha alınmayacaq.

Fransadakı demoqrafik vəziyyət, yaxud fertillik indeksi də ürəkaçan deyil. Sözügedən indeks 2,1 olmalı halda 1,8-dir, ölkədə əhali sayı azalmaqda davam edir.

Digər tərəfdən Korsikada separatçıların son ayyarımda səngiməyən aksiyaları, havaların qəflətən soyuması nəticəsində fermerlərin böyük itkilər verməsi, elə həmin fermerlərin son iki ildə ən genişmiqyaslı etiraz aksiyaları keçirmələri - bunlar da ciddi problemlərdir.

Xarici siyasətə gəldikdə isə...

Postsovet məkanında yalnız Ermənistanla "normal" münasibətlər var: yerdə qalan ölkələr Fransanı ikiüzlü dövlət sayırlar.

Afrika və Yaxın Şərqdə rəsmi Parisə etibar edənlərin sayı sürətlə azalır.

Çinlə də münasibətlər normallıqdan çox uzaqdır.

Ən başlıcası isə Fransa artıq solçulardan, sağçılardan və mərkəzçilərdən ibarət üç düşərgədən ibarətdir.

Seçkilərin qalibi bunu nəzərə almalıdır: onun hər addımını rəqib düşərgə mənsubları az qala zərrəbinlə izləyəcəklər.

Əsas seçki deyil - seçkidən sonra olacaqlardır.

Elçin Alıoğlu

Milli.Az