Azərbaycanda satılan körpə qidaları təhlükəlidirmi?

Bir neçə gün əvvəl uşaq qidaları ilə bağlı səs-küyə səbəb olan məlumat yayıldı. Böyük Britaniya mütəxəssislərin araşdırmasına görə, dünyanın bütün ölkələrində satılan populyar uşaq yeməklərinin tərkibində mərgümüş və digər zəhərli maddələr aşkarlanıb. Həmin qidaları istehsal edən şirkətlər maddələrin insan orqanizmi üçün təhlükəli olmadığını desələr də, ekspertlər bunun tam əksini söyləyirlər. "Organix", "Hipp", "Nestle" və "Holle" uşaq qidaları şübhə altındadır.

İsveçdəki Karolin İnstitutunun metallar və sağlamlığın tədqiqatı bölməsinin alimləri Karin Lyunqun rəhbərliyi ilə araşdırma aparıblar. Onların gəldikləri nəticə budur ki, uşaq qidalarının tərkibində mərgümüşlə yanaşı kadmium, qurğuşun və uran da var. Özü də ən çox mərgümüş düyü əsasında hazırlanmış uşaq qidalarında tapılıb.

Alimlərin hesablamalarına görə, "Organix" uşaq qidasının hər porsiyasının tərkibində 2 mikroqram mərgümüş, 0,03 mikroqram kadmium və 0,09 mikroqram qurğuşun var.
"HiPP" qidasında həmin rəqəmlər 1,7, 0,13 və 0,33-ə bərabərdir.
"Holle"nin hər porsiyasında isə 7,3 mikroqram mərgümüüş, 0,38 qram kadmium və 0,26 mikroqram qurğuşun olub.

Azad İstehlakçılar Birliyinin sədri Eyyub Hüseynov Milli.Az xəbər portalına açıqlamasında bildirdi ki, vaxtaşırı belə məsələlər ortaya çıxır. Onun sözlərinə görə, birmənalı şəkildə körpə qidaları arzuolunmazdır, körpələr ana südü ilə qidalanmalıdır. E.Hüseynov qeyd etdi ki, körpə qidasından zəhərlənmə hallarına nadir hallarda rast gəlinir. Azərbaycanda son 13 il ərzində cəmi 2 zəhərlənmə qeydə alınıb.

Qidalarda zəhərli maddələrin olmasına gəldikdə, E.Hüseynov hesab edir ki, tərkibində təhlükəli maddələrə, ağır metallar olan qidalar həmin qidanın müəyyən seriya buraxılışına aid ola bilər. Yəni, hansısa istehsal buraxılışında təhlükəli komponent tapılıbsa, bunu həmin qidaların hamısına aid etmək olmaz.

E.Hüseynov deyir ki, "Körpə Uşaqların Qidalanması haqqında Azərbaycan Respublikasının Qanunu"nda göstərilir ki, 3-cü ölkədən ölkəyə uşaq qidasının idxalı qadağan olunur. Qida birbaşa istehsalçı ölkədən idxal olunmalıdır. Bunun isə incə bir səbəbi var. Müxtəlif ölkələrdə ayrı-ayrı elementlərin çatışmazlığı olur.

"Məsələn, Azərbaycanda qidanın tərkibində dəmir elementinin çatışmazlığı var. Bizim əhalinin 70%-dən çoxu dəmir elementinin çatışmazlığından əziyyət çəkir. Konkret olaraq hansısa ölkələr üçün istehsal edilən mallar eksklüziv hazırlanır və həmin çatışmayan komponent ora əlavə olunur. Zəhərli maddələr istisna olmaqla, ağır metallar olan qidalar ekspertizadan keçirilib və məlum olub ki, həmin ölkədə həmin komponentlərin çatışmazlığı var. Bir neçə il öncə, İsraildə körpə qidalarının tərkibində təhlükli maddələr tapıldı. Sonradan məlum oldu ki, həmin məhsul İsrail üçün təhlükəlidir, qidanın istehasal olunduğu ölkə üçün o qədər də təhlükəli deyil" - deyə, E.Hüseynov əlavə etdi.

Azərbaycanın baş pediatrı Nəsib Quliyev Milli.Az-a açıqlamasında bildirdi ki, körpə qidalarının hamısı inək südünün bazasında yaradılır: "Britaniya mütəxəssisləri bu qənaətə necə gəldiklərini deyə bilmərəm, ancaq normal qidaların hamısı inək südündən düzəldilir. İstənilən halda süni qida qarışığı uşaqlar üçün yaddır, onun içərisində yad qarışıq olsa da, olmasa da".

Respublika Gigiyena və Epidemiologiya Mərkəzinin (GEM) qida gigiyenası şöbəsinin rəhbəri İmran Abdullayevin portalımıza verdiyi məlumata görə, son 5 il ərzində uşaq qidalarında heç bir zəhərlənmə halı qeydə alınmayıb. Bununla belə uşaq qidaları ilə bağlı araşdırma aparılır. Ölkəyə daxil olan körpə qidalarına Respublika Sanitariya-Karantin Müfəttişliyi nəzarət edir.

Respublika Sanitariya-Karantin Müfəttişliyinin rəis müavini Cəfər Əhmədov da bildirdi ki, körpə qidalarında zəhərli maddələrin olması kimlərinsə uydurmasıdır. Belə məlumatların əsası yoxdur. Ölkəyə daxl olan körpə qidalarının əksəriyyəti sağlamlıq üçün təhlükəli deyil.

Anar Məmmədov
Milli.Az