Milli kitab müsabiqəsinin qalibi açıqlandı, nəticə qalmaqala səbəb oldu

Milli Kitab Mükafatının bu ilki qalibi elan edilib. Azadlıq.org saytının xəbərinə görə, yazıçı Pərviz Cəbrayıl 1-ci yerə layiq görülüb.

2-ci mükafatı Məqsəd Nur, 3-cü isə yeri isə Natiq Rəsulzadə və Nəriman Əbdürrəhmanlı bölüşüblər.

Ən yaxşı tərcüməyə görə Kamran Nəzirli mükafatlandırılıb.

Pərviz Cəbrayıl həm də müsabiqənin saytında oxucular arasında keçirilən səsvermədə də birinci olduğu üçün mükafatlandırılıb.

Lakin müsabiqənin nəticəsi ədəbi mühitdə böyük qalmaqal yaradıb. Yazıçı Pərviz Cəbrayılın "Yad dildə" romanının Milli Kitab Mükafatının qalibi seçilməsinə etiraz olaraq Münsiflər Heyətinin 3 üzvü istefa verdiyini bildirib.

Bu barədə "525-ci qəzet"in baş redaktoru Rəşad Məcid bildirib.

Onun sözlərinə görə, P.Cəbrayıl birinci yerə layiq deyil, onu münsiflər heyətindəki bəzi qruplaşmalar birləşib, sözü bir yerə qoyub qalib ediblər.

"Bu, MKM-ə ziyan vuracaq. Hətta sponsorlar da MKM-i dəstəkləməkdən imtina edə bilər. Mən gələn il MKM-in münsifləri sırasında olmayacam".

Daha iki münsif - parlamentin insan haqları komissiyasının sədri Rəbiyyət Aslanova və Azərbaycan Yazıçılar Birliyinin katibi Çingiz Abdullayevin də eyni addımı atdığı bildirilir.

Müsabiqənin təşkilatçısı Nigar Köçərli isə sözügedən münsiflərin belə bir addım atması haqda hələ məlumatı olmadığını, onların bunu etməsinə inanmadığını bildirib.

O deyib ki, belə bəyanatlar emosional reaksiya ola bilər. N.Köçərli inanmır ki, P.Cəbrayılın qalib elan edilməsi belə ciddi reaksiya doğura bilər.

O, nəticənin gözlənilməz olmadığını da bildirib. "Mən o əsərə inanırdım, ən azı ilk üçlükdə olacağına inanırdım".

Qeyd edək ki, müsabiqədə ilk onluğa aşağıdakı əsərlər daxil olub və qalib əsər bu onluqdan seçilib:

Aslan Quliyev, "Sonuncu", roman
Azər Abdulla, "Sarı tağ", roman
Etimad Başkeçid, "Kenterberri" silsiləsi, hekayələr
Məqsəd Nur, "Şəhər meri", roman
Mirmehdi Ağaoğlu, "Küləyi dişləyən", hekayə
Nəriman Əbdülrəhmanlı, "Yolsuz", roman
Natella Osmanlı, "Mən axmağam",
Natiq Rəsulzadə, "Xunxarlar", roman (rus dilində)
Pərviz, "Yad dildə", roman
Paşa Qəlbinur, "Qara su", roman

Müsabiqəyə ümumilikdə 112 əsər təqdim olunmuşdu. Birinci yerin qalibinə 3 min, 2-ci yeri tutana 2 min, 3-cü yeri tutana isə 1000 manat pul mükafatı təqdim ediləcək.

Amerika səfirliyi isə ABŞ yazıçısının əsərini ingilis dilindən Azərbaycan dilinə ən yaxşı tərcümə etmiş müəllifə 1000 manat məbləğində mükafat verəcək.

Münsiflər heyətinin üzvləri:

Yazıçı Afaq Məsud,
yazıçı Çingiz Abdullayev,
ssenarist Rüstəm İbrahimbəyov,
"Zerkalo" qəzetinin baş redaktoru Elçin Şıxlı,
kinorejissor Ramiz Fətəliyev,
Xalq şairi Vaqif Səmədoğlu,
BDU-nun professoru Rəbiyyət Aslanova,
"525-ci" qəzetinin baş redaktoru Rəşad Məcid,
"Xəzər" Universitetinin rektoru Hamlet İsaxanlı,
aparıcı-jurnalist Nərgiz Cəlilova,
prodüser Balakişi Qasımov,
tarix elmləri doktoru, BDU-nun professoru Cəmil Həsənli,
AMEA-nın müxbir üzvü professor Rafiq Əliyev,
Fəlsəfə elmləri doktoru, AİU-nın professoru Niyazi Mehdi,
"Qanun" nəşriyyatının sahibi Şahbaz Xuduoğlu,
kinorejissor Ayaz Salayev
rejissor Mehriban Ələkbərzadə

Mükafatın təsisçısı "Əli və Nino" Nəşriyyat Evidir.

Milli.Az