“90 illik irs” - Q.Qarayev adına Azərbaycan Dövlət Kamera Orkestrinin möhtəşəm konsert proqramı təqdim olundu - FOTO

M.Maqomayev adına Azərbaycan Dövlət Akademik Filarmoniyasında "90 illik irs" adlı yubiley konsertlər silsiləsi çərçivəsində dirijor, əməkdar artist Əyyub Quliyevin rəhbərliyi ilə Q.Qarayev adına Azərbaycan Dövlət Kamera Orkestrinin möhtəşəm konsert proqramı təqdim olundu.

1936-cı ildə əsası qoyulan Filarmoniyanın 90 illik yubileyi münasibətilə keçirilən bu möhtəşəm musiqi axşamı sənətsevərlərə zəngin və yaddaqalan proqram bəxş etdi. Gecə A.Vivaldi-nin "Olimpiada" operasına yazılmış Uvertürası ilə başladı. Bakıda ilk dəfə səslənən bu əsər dinləyicilər tərəfindən böyük maraq və alqışlarla qarşılandı. Ardınca L.Boccherini-nin məşhur "Madriddə yürüş" əsəri ifa olundu və XVIII əsr Avropa musiqisinin incə zövqü və koloriti konsert salonunda xüsusi ovqat yaratdı. Proqramda həmçinin müasir bəstəkar A.Veselovsky-nin "Mələklərin mahnısı II" əsəri Bakıda ilk dəfə təqdim edildi. Əsərin dərin emosional məzmunu və zərif musiqi dili dinləyicilərə unudulmaz anlar yaşatdı. Konsertin xüsusi məqamlarından biri J.Haydn-nın B-dur Messasından "Gloria" hissəsinin ifası oldu. Əsərin təqdimatında Azərbaycan Dövlət Akademik Opera və Balet Teatrının Xoru (xormeyster Sevil Hacıyeva) iştirak etdi. Daha sonra G.F.Handel-in dünya musiqi irsinin şah əsərlərindən sayılan "Messiya" oratoriyasından məşhur "Hallelujah" xor nömrəsi səsləndi. Əsərin möhtəşəm ifası salonda xüsusi coşğu və bayram əhvali-ruhiyyəsi yaratdı. Musiqi axşamı A.Dvorak-ın simli orkestr üçün yazdığı E-dur Serenadası, op.22 ilə yekunlaşdı. Romantik üslubun ən parlaq nümunələrindən biri olan bu əsərin zərif və parlaq ifası konsertin möhtəşəm finalına çevrildi.

90 illik zəngin sənət yolu keçən M.Maqomayev adına Azərbaycan Dövlət Akademik Filarmoniyası bu gün də milli musiqi ənənələrinin qorunması və dünya musiqi incilərinin təbliği istiqamətində mühüm missiyasını uğurla davam etdirir. "90 illik irs" adlı yubiley konsertlər silsiləsi Filarmoniyanın ölkənin mədəni həyatındakı əvəzsiz rolunu bir daha nümayiş etdirdi.

İnformasiya dəstəyi - Trend.Az, Day.Az, Milli.Az