Mədəniyyət

Nəzrin Əfəndiyeva: "Qəbələ festivalı musiqi vasitəsilə mədəniyyətlərarası dialoqa öz töhfəsini verir"

27 İyul 2012 19:02

Baxış: 2 490

VTB-də minimal faiz dərəcəsi ilə nağd kredit 10.49%-dən

"Bundan əvvəl Qəbələdə keçirilmiş üç beynəlxalq musiqi festivalı haqqında eşitmişdim. Bu füsunkar diyara gəlməyi, festivalın iştirakçısı olmağı çox arzulayırdım. Nəhayət, arzuma çatdım. Deməliyəm ki, festival çox yüksək səviyyədə təşkil olunmuşdur".

AzərTAc xəbər verir ki, bu sözləri jurnalistlərə müsahibəsində festivalın iştirakçısı, dahi bəstəkar Fikrət Əmirovun Belçikada yaşayan nəvəsi, beynəlxalq müsabiqələr laureatı, gənc pianoçu Nəzrin Əfəndiyeva demişdir.

O, builki festivalın proqramına əlavə edilmiş bir yeniliyi, dahi musiqiçilərin, o cümlədən babası Fikrət Əmirovun yubiley tədbirinin keçirilməsini çox bəyəndiyini bildirmişdir. "Burada biz bir daha Azərbaycan mədəniyyətinin, musiqisinin ecazkarlığının şahidi olduq. Həmçinin, əcnəbi musiqiçilərin bu möhtəşəm incəsənət bayramında iştirakı və müxtəlif millətlərdən olan bəstəkarların əsərlərinin səsləndirilməsi baxımından onu deyə bilərəm ki, Qəbələ festivalı həm də musiqi vasitəsilə mədəniyyətlərarası dialoqa öz töhfəsini verir".

Pianoçu N.Əfəndiyeva səhnədə çıxışı zamanı tamaşaçıların musiqi əsərlərindən böyük zövq almasından, xüsusilə, məmnun olduğunu söyləmişdir. O, gənc musiqiçi kimi babasının yubileyi münasibətilə unudulmaz muğam incilərinin simfonik orkestrlə uğurlu sintezini çox yüksək qiymətləndirmişdir.

Milli.Az