Mədəniyyət

Ustad sənətkar Hacıbaba Hüseynovun əziz xatirəsinə həsr olunmuş "Nadir muğam gecəsi" keçirilib – FOTO

6 Mart 2026 18:21

Baxış: 1 623

VTB-də minimal faiz dərəcəsi ilə nağd kredit 9.9%-dən

#MƏDƏNİYYƏT

Müslüm Maqomayev adına Azərbaycan Dövlət Akademik Filarmoniyasında "Nadir Events"in təşkilatçılığı ilə görkəmli xanəndə, ustad sənətkar Hacıbaba Hüseynovun əziz xatirəsinə həsr olunmuş "Nadir muğam gecəsi" keçirilib.

Muğamsevərlərin böyük marağına səbəb olan gecədə sənət dünyasının tanınmış simaları bir araya gəlib. Hüseynağa Aslanovun təqdimatında baş tutan konsert proqramında Xalq artistləri Simarə İmanova, Zabit Nəbizadə, Əməkdar incəsənət xadimi Aqil Məlikov, Əməkdar artist Zakir Əliyev, eləcə də tanınmış solistlər Elgiz Əliyev, Vəfa Vəzirova, Məmməd Nəcəfov, Rövşən Bəşirov, Mütəllim Dəmirov və Hüseyn Məlikov çıxış ediblər.

İfaçıları Xalq artisti Elçin Həşimovun (tar) və Əməkdar artist Elnur Əhmədovun (kamança) rəhbərlik etdiyi xalq çalğı alətləri ansamblı, habelə Altay Niftəliyev (tar) və Xəyyam Məmmədov (kamança) müşayiət edib.

Gecənin repertuarı Hacıbaba Hüseynovun zəngin irsinə uyğun olaraq rəngarəngliyi ilə seçilib. Tamaşaçılar sənətkarların ifasında "Segah", "Bayatı-Şiraz", "Çahargah" və "Rast" muğamlarından parçaları, dərin fəlsəfi təsnifləri və hər zaman sevilən "Ay Dilbər" xalq mahnısını böyük rəğbətlə dinləyiblər.

Ustad xanəndənin sənət yoluna ehtiramın ifadəsi olan bu musiqi axşamı klassik irsin yaşadılması və gənc nəslə ötürülməsi baxımından əlamətdar hadisə kimi yadda qalıb.

İnformasiya dəstəyi - Trend.Az, Day.Az, Milli.Az, Azernews.Az