"Xalçaçı Günü"nə həsr olunmuş mükafatlandırma mərasimi keçirilib - FOTO

Mədəniyyət Nazirliyinin nəzdində Mədəni və Yaradıcı Sənayelərin İnkişaf Mərkəzi (Yaradıcı Mərkəz) dəstəyi ilə "Xalçaçı Günü"-nün peşə bayramı şərəfinə bayram mükafatlandırma mərasimi keçirilib. 

Tədbirdə Mədəniyyət Nazirliyinin nəzdində Mədəni və Yaradıcı Sənayelərin İnkişaf Mərkəzinin (Yaradıcı Mərkəz) icraçı direktoru Lalə Əhmədova, xalçaçı-texnoloq, sənətşünas Afət Əliyeva, "Azərxalça" ASC-nin İstehsalat üzrə direktoru Əlisafa Nuriyev, xalçaçılıq nümayəndələri çıxış ediblər. 

5 may- "Xalçaçı Günü" ilə əlaqədar xalqımızın mənəvi dünyasını, həyata, duyğu və düşüncələrə fəlsəfi baxışını əks etdirən bu qədim milli sənət növünün qorunub saxlanılması və inkişaf etdirilməsi üçün həyatlarını xalçaçılığa həsr edən hər kəsə səmimi qəlbdən təbriklər çatdırılıb. Bildirilib ki, xalçaçılıq Azərbaycanın ənənəvi, qədim dekorativ - tətbiqi sənət növlərindən biridir və dövlət tərəfindən bu sahənin inkişafına və təbliğinə xüsusi diqqət yetirilir. Xalçaçılığın inkişafında qadınların rolu xüsusi vurğulanıb. Azərbaycanda istehsal olunan xalça və xalça məmulatları bir çox tarixi kitablarda, klassik ədəbiyyatda və folklorda dəfələrlə təriflənmişdir. Azərbaycan xalçaları bütün dünyada muzeylərdə və şəxsi kolleksiyalarda saxlanılır. Azərbaycan xalçaçılarının şah əsərləri olmadan dünya mədəniyyəti xəzinəsini təsəvvür etmək çətindir. Yeddi xalça məktəbi Bakı, Quba, Şirvan, Gəncə, Qazax, Qarabağ və Təbriz -  hər biri öz orijinal texnikasından istifadə edərək ornamentlə tanınan əsərlər yaradır. Azərbaycan xalça sənəti YUNESKO-nun "Bəşəriyyətin qeyri-maddi mədəni irsinin reprezentativ siyahısı"na  daxildir. 

Azərbaycan milli xalça muzeyi, "Azərxalça", xalq rəssamı Eldar Mikailazdenin emalatxanası və digər xalçaçılara və bu sahənin mütəxəssislərinə təşəkkür diplomları təqdim olunub. Qonaqlar üçün bayram süfrəsi təşkil edildi, konsert proqramı təqdim edildi.

Milli.Az