Mədəniyyət

Filarmoniyanın “Gənclərə dəstək” layihəsi iştirakçılarının konserti keçirilib - VİDEO - FOTO

25 May 2022 20:40

Baxış: 944

Müslüm Maqomayev adına Azərbaycan Dövlət Akademik Filarmoniyasının Kamera və Orqan Musiqisi zalında Azərbaycan Respublikası Mədəniyyət Nazirliyinin təşkilatçılığı ilə l Beynəlxalq Bakı Piano Festivalında Filarmoniyanın "Gənclərə dəstək" layihəsi iştirakçılarının, gənc pianoçularımızın möhtəşəm konserti keçirilmişdir. Konsertdə Valid Ağayevin dirijorluğu altında Qara Qarayev adına Azərbaycan Dövlət Kamera Orkestrinin müşayiəti ilə Hüseyn Niftəliyev, Ömər Həsənli,Turan Cəfərzadə,Nil Mürsəlova, Humay İbrahimli, Rinat Şərifli, İnci Həsənli, Fidan Nağıyeva, Əsgərli İqan Ümid, Aylin Babayeva, Əli Vəliyev, Mirsəməd Növrəsli kimi musiqi məktəbləri arasında ən parlaq və istedadlı pianoçularımız çıxış etdi. Konsertdə Emin Sabitoğlu - "Bizim cəbiş müəllim" k/f-dən musiqi, Fazil Say - Volfang Amadey Motsart - "Jazz Fantazy on Mozart", Fərhad Bədəlbəyli - "Dəniz" , Sergey Prokofyev - "Romeo və Cülyetta" baletindən "Montekki və Kapuletti", Tofiq Quliyev - "Qaytağı" kimi bir-birindən gözəl əsərlər ifa olundu. Konsert tamaşaçılar tərəfindən gurultulu alqışlarla sona çatdı. Konsertin sonunda Bakı Piano Festivalının təsisçisi və direktoru Əməkdar artist Şahin Növrəsli tərəfindən gənc pianoçulara hədiyyələr təqdim olundu və "Gənclərə dəstək" layihəsi iştirakçıları diplomlarla təltif olundular.

İnformasiya dəstəyi - Trend.az, Day.az, Milli.az, Azernews.az