Dünya

Bazar günündən etibarən İsraildə üçüncü məhdudiyyət rejimi başlayacaq

25 Dekabr 2020 21:45

Baxış: 894

VTB-də minimal faiz dərəcəsi ilə nağd kredit 10.49%-dən

#DÜNYADA #İSRAİL #KORONAVİRUS

Dekabrın 27-dən etibarən İsraildə pandemiya dövrünün üçüncü məhdudiyyət rejimi başlayacaq.

Milli.Az AZƏRTAC-a istinadən bildirir ki, bu barədə qərarı İsrail hökuməti Səhiyyə Nazirliyinin təklifi ilə qəbul edib. Məhdudiyyət rejimi ən azı iki həftə və ya gündəlik yoluxma hallarının sayı 1000 nəfərə qədər azalanadək qüvvədə qalacaq. Hazırda bu göstərici 4 minə yaxındır.

Bazar günündən başlayaraq ölkədə bütün qeyri-ərzaq satışları dayandırılacaq və bütün əyləncəli tədbirlər qadağan ediləcək. Həmçinin müştərilərlə birbaşa çalışmayan kompaniyalar öz fəaliyyətini yarıbayarı azaltmalıdır. Ölkə ərazisində ictimai nəqliyyatın hərəkəti də məhdudlaşdırılacaq.

Əvvəlki məhdudiyyətlərdən fərqli olaraq, bu dəfə uşaq bağçaları və məktəblər qısaldılmış qrafik üzrə fəaliyyətini davam etdirəcək. Vətəndaşlar uşaqlarını məktəbə aparmaq və vaksinasiyada iştirak etmək halları istisna olmaqla, evlərindən bir kilometrdən çox uzaqlaşa bilməyəcək. Habelə qonaq getmək və qohumları yoluxmaq da qadağan olunacaq. Lakin vətəndaşlar açıq havada idmanla məşğul ola biləcək.

Qeyd edək ki, İsraildə koronavirus qarşı vaksinasiya artıq başlayıb. Ölkənin səhiyyə müəssisələri "BioNTech" və "Pfizer" kompaniyalarının birgə hazırladıqları vaksindən istifadə edirlər.

Milli.Az