"Bir gün "Barselona"ya qayıtmaq istərdim"

"Barcelona"nın canlı əfsanəsi və hazırda karyerasını Qətərin "Al Sadd" klubunda davam etdirən Xavi Ernandes ərəb mediasına müsahibə verib.

Milli.Az goal.az-a istinadən ispan yarımmüdafiəçinin müsahibəsini təqdim edir.

- İzlədiyiniz ilk dünya çempionatı haqqında hansı xatirələriniz var?

- Dəqiq yadımda deyil, uşaqlıqda görmüşəm, yoxsa daha sonra. Amma mundial haqqında ilk xatirəm 1982-ci il İspaniyadakı dünya çempionatının maskotu - Naranxitodur. Daha sonra 1986-cı il mundialında Maradonanı xatırlayıram. Həmin vaxt 6 yaşım vardı. Məşhur "tanrının əli" yadıma gəlir. Onun İngiltərənin qapısından keçirdiyi və futbol tarixinə düşən inanılmaz qolunu, Argentinanın çempion olmasında Diyeqonun təsirini xatırlayıram. Özüm İspaniyanın heyətində dünya çempionatında oynamayana kimi bu turnirin oyunlarını stadiondan izləməmişdim. Lakin mundial oyunlarının böyük əksəriyyətinə televizorda baxmışdım. Hətta İspaniya vaxtı ilə gecəyarısı saat 3-4-də baş tutan ABŞ mundialının oyunlarına da. Ailəmin bütün üzvləri futbola baxmaq üçün oyanardılar. Futbol mənim həyatımdır. Bu oyuna baxmağı da sevirəm.

- CAR-da keçirilmiş dünya çempionatı Afrika qitəsində bir ilk oldu və İspaniya çempionluğu bayram etdi. Siz komandaya bu tarixi zəfəri qazanmaqda necə kömək etdiniz?

- Turnirə yaxşı başlamadıq. İlk oyunda İsveçrəyə minimal hesabla məğlubiyyət bir az tərəddüd keçirməmizə səbəb oldu. Normaldan daha çox həyəcanlı idik. Portuqaliya ilə oyuna qədər kifayət qədər yaxşı təsir bağışlamasaq da, silahlarımızdan istifadə etdik. Mundialın 1/8 finalında portuqalları məğlub etdik. Daha sonra Paraqvaya qalib gəlmək üçün çalışmalı olduq. Finalda Hollandiyaya qarşı da gözəl oyun göstərdik. Avropa çempionatındakı uğurun təsadüfi olmadığını sübut etdik. Komandada qalib ruhu vardı. Hiss edirdik ki, istənilən rəqibi məğlub etməyə qadirik. Meydanda rahat idik.

- Asiyada keçiriləcək ilk dünya çempionatına 7 il qalıb. Qətərdə bu turnirə hazırlıq işləri ilə tanış olmaq imkanınız var. Bu işlər barədə nə deyə bilərsiniz?

- Bu layihədə iştirak etməyə, ailəmlə birlikdə Qətərə gəldiyimə görə həyəcanlıyam. Çünki bu, ölkə üçün, həqiqətən də, möcuzəvi layihədir. Fikrimcə, Qətərin dünya çempionatı təşkil etmək üçün yetərincə infrastrukturu mövcuddur. Stadionlar gələcəkdə möhtəşəm olacaq. Təsislər bir-birinə yaxın yerləşəcək. Bu amil azarkeşlər üçün əhəmiyyətlidir. Çünki bir oyunu izləyən azarkeş qısa müddət sonra digər stadiona gedib başqa matça baxa biləcək. Futbolçular üçün də uzun səyahətlər etməyib eyni oteldə qalmaq maraqlı olacaq. Bunlar əlavə üstünlükdür.

- Necə düşünürsüz, dünyada hər region dünya çempionatını təşkil etmək hüququna malikdir?

- Qətər mundiala ev sahibliyi edəcək ilk ərəb ölkəsi olacaq. Məncə, futbol qlobal, universaldır. Ərəb ölkəsinin də dünya çempionatını keçirmək hüququ var. Burada futbola böyük maraq var. İnsanlar İspaniya çempionatını yaxından izləyirlər. Qətər dünya çempionatını təşkil etməyə layiqdir.

- Qətər millisi Rusiyada keçiriləcək 2018-ci il dünya çempionatının seçmə mərhələsinə yaxşı başlamayıb. Sizcə, komanda qarşıdakı mundiala vəsiqə qazana biləcək?

- Bəli. Asiyada böyük xalqlar, komandalar olsa da, Qətər düşdüyü qrupdan çıxmalıdır. Onların istedadı buna imkan verir. Fikrimcə, komandanın şansı var.
 

- Futbol karyeranızı bitirdikdən sonra məşqçi kimi çalışmaq ehtimalınız var?

- Futbolu, meydana yaxın olmağı sevirəm. Burada "Aspire Academy"də təhsil alıram. Gələcəkdə məni nə gözlədiyini bilmirəm. Amma bir gün "Barcelona"ya qayıtmaq istərdim. Bu, mənim məqsədimdir.

Milli.Az