Ən yüksək rütbəli şəhid hərbi həkim anıldı - VİDEO

44 günlük müharibənin son günü düşmən pusqusuna düşərək şəhid olan Rasim Abdullayevin anım günüdür. O, düşmənlə həm silah, həm də əlinin şəfasıyla savaşırdı. Döyüşlərdə 100-dən çox yaralı əsgərə tibbi yardım göstərən polkovnik leytenant Rasim Abdullayev, Vətən müharibəsi tarixində şəhid olan ən yüksək rütbəli şəhid hərbi həkimdir.

Milli.Az Real TV-yə istinadən xəbər verir ki, yaxınları, ailəsi, döyüş yoldaşları, məktəbli uşaqlar vətən müharibəsinin sonuncu şəhidlərindən olan Rasim həkimi məzarı başında yad edib ruhuna dualar oxudular. Ondan miras qalan iki övladı bu gün böyük fəxr hissilə qəhrəman atalarının medallarını təhvil alıb, şəhidin xatirəsini əziz tutdular.

Döyüş yoldaşları da şəhidi, qorxmaz və şücaətli hərbçi kimi xatırlayırlar. Onlar deyirlər ki, şəhid Rasimin müharibə yoldaşlarıyla bölüşdüyü arzuları var idi.

Rasim Abdullayev 1975-ci il fevralın 21-də Kəlbəcər rayonunun Milli kəndində doğulub. Tibb Universitetində təhsil alan Rasim, sonralar Mərkəzi Hərbi Poliklinikada şöbə rəisi vəzifəsini yerinə yetirib. O, həm Aprel Döyüşləri, həm də Vətən Müharibəsi zamanı döyüşün qızğın nöqtələrində qalan yaralı zabitlərə yerindəcə tibbi yardım göstərib.

Vətən müharibənin son dəqiqələri üçtərəfli bəyanat imzalanandan bir müddət əvvəl Şuşa istiqamətində qalmış yaralıların çıxarılması üçün yollanan Rasim, Xocalı rayonunun Çanaqçı kəndi istiqamətində, düşmənin pusqusuna düşərək şəhid olub.

Rasim Abdullayev, ölümündən sonra "Vətən uğrunda, "Şuşanın azad olunmasına görə", "Cəbrayılın azad olunmasına görə", "Füzulinin azad olunmasına görə" və "Xocavəndin azad olunmasına görə" medalları ilə təltif edilib.

Şair ruhlu şəhid, öz doğma torpağı Kəlbəcərə dönə bilmədi, ancaq xilas etdiyi onlarla Azərbaycan zabitləri indi azad olan torpaqlarımızın keşiyində dururlar. Öz şeirində də dediyi kimi Rasim artıq gözlərimizə görsənmir ancaq xatirəsi beyinlərdən heç vaxt silinməyəcək.

Milli.Az