Falçı Məlahət susur: o, haradadır?

Milli.Az "Yeni Müsavat"a istinadən bildirir ki, uzun müddət Rusiyada yaşayan ekstrasensin səhhətində ciddi problemlər yarandığı iddia edilir. Hələlik ekstrasensin ailəsi bu haqda susur. Davamlı cəhdlərə baxmayaraq, ailə hətta etibar etdikləri insanlara belə bununla bağlı heç bir informasiya verməyib. Məlahət xanımın yaxınları sadəcə onun Bakıda olmadığını bildirir.

Məlahət Mövsümqızı keçmiş SSRİ məkanında və yaxın coğrafiyada ən güclü ekstrasenslərdən biri sayılır. Onun adı Vanqa, Messinq, Cuna, Çumak kimi ünlü öncəgörənlərlə bərabər çəkilir. Əgər onu toplum üçün maraqlı edən xəstəliklərə düzgün diaqnoz qoyması, bəzilərini müalicə etməsi, insan talelərilə bağlı proqnozları idisə, siyasi elita üçün o, siyasi öncəgörmələri ilə çəkici idi. Onun təxminən 10 il öncə dünyanı gözləyən qlobal problemlər, müharibələr, iqtisadi böhranlar, o sıradan ABŞ-ın İraqa hücumu, xristian-müsəlman dünyasında ciddi qarşıdurmalar haqda proqnozları keçmiş SSRİ məkanında ciddi marağa səbəb olmuşdu.

Rusiyanın bir neçə telekanalı "falçı Məlahət" haqqında verilişlər hazırlamışdı. Bu verilişlərdən sonra Rusiyada bir sıra elmi və siyasi dairələrinin ona maraq göstərdiyi haqda xəbərlər yayıldı. Bunun ardınca "falçı Məlahət"in Azərbaycanı tərk edərək Rusiyaya köçdüyü bildirildi. Ancaq o, ailə üzvlərinə baş çəkmək üçün arabir Azərbaycana gəlirmiş.

Məlahət Mövsümqızına yaxın olan etibarlı qaynaq onunla Bakıda fevral-mart aylarında iki dəfə görüşdüyünü, səhhətində hər hansı problem hiss etmədiyini deyir: "O, sıradan biri deyil. Hərəkətləri, danışığı fərqli, xeyli dərəcədə emosionaldır. Onu illərdir tanıyıram. Son görüşümüzdə hər hansı fərqlilik hiss eləmədim".

Bakıdakı ruhi-əsəb dispanserləri və xəstəxanalarından da informasiyanı dəqiqləşdirmək cəhdləri baş tutmayıb. Tibb müəssisələrindən bildirilib ki, xəstələrlə bağlı informasiya yalnız onun ailə üzvlərinə və hüquq-mühafizə orqanlarına verilə bilər.

Milli.Az