Qiymə alarkən paketin altına diqqət edin, təhlükə mənbəyi ola bilər

Mətbəximizin əvəzolunmazı olan qiymə düzgün seçilmədikdə ciddi sağlamlıq problemlərinə yol aça bilər. Qida mütəxəssisləri paketli qiymə alarkən yalnız rənginə aldanmamağı, paketi tərsinə çevirib altına baxmağı tövsiyə edirlər.

Milli.Az xəbər verir ki, çoxumuz marketdən qiymə alarkən ətin yalnız üst hissəsindəki parlaq qırmızı rəngə baxıb səbətə qoyuruq. Lakin bu, böyük bir səhvdir.

Paketli qiymə alarkən nələrə diqqət etməli?
Paketin dibinə baxın: Əgər qablaşdırmanın altında çox miqdarda qırmızımtıl maye toplanıbsa və ya ət sanki öz suyunda "üzürsə", o məhsulu almayın. Ətin altında az miqdarda maye olması normaldır, lakin çox maye toplanması ətin "soyuq zəncir" qaydasının pozulduğunu və saxlanma şəraitinin düzgün olmadığını göstərir.

Paketin bütövlüyü: Qablaşdırmada ən kiçik bir dəlik, çat və ya sızıntı varsa, o paketi əsla almayın. Bu, ətin daxilində ölümcül bakteriyaların yaranması və qida zəhərlənməsi riskinin yüksəlməsi deməkdir.

Hər boz rəngli ət xarabdırmı?
Xalq arasında qiymənin hər zaman parlaq qırmızı rəngdə olması lazım olduğu kimi yanlış bir inanc var. Əslində, qiymənin daxili hissəsi oksigenlə təması kəsildiyi üçün yüngülcə boz və ya qəhvəyi rəngə dönə bilər; bu, ətin xarab olduğu mənasına gəlmir.

Təzəliyin əsl əlaməti: İy və tekstura
Mütəxəssislərə görə, təzəliyi və keyfiyyəti müəyyən edən əsas amil iy və teksturadır. Təzə qiymədə turş, kəskin və ya narahat edici bir qoxu əsla olmamalıdır.

Aşağıdakı əlamətlərdən birini belə hiss etsəniz, o əti əsla istehlak etməyin:

Ətin səthində təbəqəli, selikli bir mayenin əmələ gəlməsi.

Toxunduqda əlinizə yapışqan, selikli bir hiss verməsi.

Kəskin turş iy və ya ammonyak qoxusu yayılması.

Paketin dibindəki mayenin ağır və pis qoxuması.

Evə çatdırdıqdan sonra:
Yay aylarında marketdən evə gedən yol 1 saatı keçməməlidir.

Evə çatar-çatmaz qiyməni soyuducuya qoyun və ən çox 1-2 gün ərzində istehlak edin.

Əgər bu müddətdə bişirməyəcəksinizsə, əti dərhal dondurucuya qoyaraq keyfiyyətini qoruyun.

Müəllif: Ülkər Vəliyeva (Milli.Az redaktor)