Dünəndən qalan plovu isidərkən iki dəfə düşünün

Axşamdan qalan plovu soyuducudan çıxarıb tavada və ya mikrodalğalı sobada tüstülənənə qədər qızdırmaq bir çoxumuz üçün praktiki həll yoludur. Yeməyin isti olması qida təhlükəsizliyi baxımından ürəyinizi rahatlada bilər, lakin mütəxəssislər çox vacib bir xəbərdarlıq edirlər. 

Milli.Az xəbər verir ki, düyü tarladan süfrəmizə gələnə qədər özündə "Bacillus cereus" adında dözümlü bir bakteriya saxlaya bilir. Düyünü bişirib qaynatmaq canlı bakteriyaların çoxunu öldürsə də, bir qisim bakteriyalar yüksək temperaturdan sağ çıxa bilər. Qazan bişdikdən sonra otaq temperaturunda gözlədildikdə nəmli və isti mühiti tapan bu bakteriyalar canlanaraq çoxalmağa başlayır.

Qazandakı zəhərli maddələr ölmür
Əsl kritik nöqtə isə bu bakteriyaların istehsal etdiyi "cereulide" adlı toksindir. Bu təhlükəli toksin istiliyə, mədə turşusuna və hətta həzm fermentlərinə qarşı inanılmaz bir dözümlülüyə malikdir. Yəni ertəsi gün plovu nə qədər yüksək istilikdə qovursanız qovurun, bakteriyalar ölsə belə qazanda yığılan zəhərli maddələr yox olmur.

"Qoxusunda normal idi" deyərək aldanmayın
Bu cür qida zəhərlənmələri adətən yeməkdən dərhal sonra gələn 1-6 saat ərzində şiddətli ürəkbulanma və qusma ilə özünü büruzə verir. Ən təhlükəli tərəfi isə plovun qoxusunda, dadında və ya görünüşündə heç bir dəyişikliyin olmamasıdır. Buna görə də ənənəvi üsullarla aparılan dad və qoxu yoxlamaları plovun təhlükəsiz olduğunu sübut etmir.

Ən geci 1 saat ərzində soyuducuya qoyun
Dünəndən qalan hər plovu zibilə atmaq əlbəttə ki, lazım deyil, lakin düzgün saxlama qaydalarına əməl etmək şərtidir. Qida təhlükəsizliyi mütəxəssisləri bişən plovu böyük qazanda dəzgahda soyumağa buraxmağın ən böyük səhvlərdən biri olduğunu qeyd ediblər. Böyük qazanların ortası uzun müddət isti qalaraq bakteriya yaranmasına şərait yaradır. Plovu dayaz və kiçik qablara bölərək ən geci 1 saat ərzində soyuducuya qoymalısınız.

Yalnız 1 dəfə qızdırılmalıdır
Soyuducudan çıxarılan plov 24 saat ərzində istehlak edilməli və yalnız bir dəfə qızdırılmalıdır. Mikrodalğalı sobada qızdırılacaqsa, kənarlarının qızması bəs etmir; ara-sıra qarışdırılaraq hər yerindən buxar çıxması təmin edilməlidir. Restorandan sifariş edilən plovların onsuz da əvvəlcədən bişirilib qızdırılmış olma ehtimalı yüksəkdir. Necə hazırlandığını bilmədiyiniz, çöldən sifariş verilən plovları saxlamayıb elə həmin gün istehlak etmək ən təhlükəsiz üsuludur.

Müəllif: Ülkər Vəliyeva (Milli.Az redaktor)