"Oradakı bəzi adamların kimə işlədiklərini bilirəm"

"1993-cü ildən bu yana, hətta 1990-cı ildə başlamış hadisələrin səmimi analizi, ayrı-ayrı siyasətçilərin davranışı dəqiq təhlil edilməyincə, ölkə müxalifətindəki problemlər tükənən deyil".

Bu fikirlər tanınmış siyasətçi, hüquqşünas Qurban Məmmədova məxsusdur. O, Milli.Az xəbər portalına verdiyi açıqlamasında bildirdi ki, kimin kim olduğu bəlli olmayınca, müxalifət düşərgəsindəki xaotik sistemsiz proseslər davam edəsidir.

"Azərbaycan müxalifətinin birlik problemi var. Müxalifət partiyalarının liderləri arasında müstəqil olmayanlar, kənardan idarə edilənlər var. Heyif, çox heyif ki, müxalifətdəki qüvvələr belə siyasi liderlərin rəhbərliyi altında məhv olub gedirlər. Bizdə siyasi təşkilatın maraqları ayrı-ayrı liderlərin maraqlarına qurban verilir. Təşkilatları cəhənnəm olsun - dövlətin və xalqın maraqlarını qurban verirlər. Şair Rüstəm Behrudinin sözlərilə desəm, ortada Azərbaycan adlı ananın tabutu var, onu qaldıran yoxdur. Bu tabutun altına girməyə qeyrət, şəxsi maraqları unutmaq gərəkdir", - Qurban Məmmədov dedi.

Q.Məmmədov deyir ki, İctimai Palata yeni yarananda həmin təşkilata qoşulmaqla bağlı təklif almışdı: "O təşkilata qatılmağı da düşünürdüm. Lakin sonradan İctimai Palatada kimlərin olduğu gördüm və fikrimi dəyişdim. Çünki oradakı bəzi adamların kimliyini, kimlərə işlədiklərini gözəl bilirəm. Nəticə də göz qabağındadır. İctimai Palata mitinqlərə başlayanda da yoldaşlara dedim ki, bu, yanlış yoldur - belə eləmək olmaz. Müxalifət liderlərinin öndə getməyəcəkləri təqdirdə beş-on nəfəri küçəyə çıxarmaq nəyə gərəkdir?! Bütün bunlar ölkə müxalifətindəki müəyyən adamların millət və dövlətin maraqlarını bir kənara qoyaraq öz şəxsi ambisiyalarını önə çəkməsinin səbəbidir".

Qurban Məmmədov bütün bunlara rəğmən, müxalifət düşərgəsində birliyin yaranacağına ümid edir.

Orxan Hun
Milli.Az