Sağlamlıq

Uşaqlara Crocs ayaqqabılar geyindirməyin - Səbəb

24 İyun 2026 12:57

Baxış: 2 021

VTB-də minimal faiz dərəcəsi ilə nağd kredit 9.9%-dən

#UŞAQ #HƏKİM

"Formalaşmaqda olan uşaq pəncəsinin normal inkişafı üçün Crocs tipli ayaqqabılar uyğun hesab edilmir".

Milli.Az xəbər verir ki, bu sözləri pediatr-nevroloq Nurəngiz Hacıyeva bildirib.

Onun sözlərinə görə, sintetik materialdan hazırlanan bu ayaqqabılar ayaqda tərləmə və nəmli mühit yarada bilər. Bu isə uzun müddətli istifadədə göbələk infeksiyalarının yaranması riskini artırır.

N.Hacıyeva qeyd edib ki, Crocs ayaqqabıları ayağı tam şəkildə sabitləmədiyi üçün ayaq qövsünə kifayət qədər dəstək verməyə bilər:

"İnkişaf dövründə olan uşaqlarda düzgün biomexanikanın pozulması pəncə deformasiyalarına, həmçinin barmaq oynaqlarında iltihabi proseslərin yaranmasına səbəb ola bilər".

Mütəxəssis xüsusilə arxa qayışdan istifadə edilmədikdə ayağın ayaqqabı daxilində sürüşdüyünü və bunun oynaqların zədələnməsi riskini artırdığını vurğulayıb.

Bildirib ki, Crocs uzun məsafəli gəzintilər üçün də uyğun deyil. İzah edib ki, ayaqqabının içi boş olur və ayağı kifayət qədər möhkəm saxlamaması nəticəsində uşaq yeriyərkən əlavə güc sərf edir:

"Bu da ayaq, diz və bel nahiyəsinə artıq yük düşməsinə səbəb ola bilər".

Həkim uşaqların qaçış zamanı da zədə alma ehtimalının yüksəldiyini, ayağın kifayət qədər sabit saxlanmaması səbəbindən burxulma riskinin artdığını qeyd edib. O, həmçinin yaş və hamar səthlərdə bu tip ayaqqabıların sürüşmə təhlükəsi yaratdığını diqqətə çatdırıb:

"Odur ki, nəinki uşaqlarda, hətta böyüklərin də bu ayaqqabıları istifadə etməsini məsləhət görmürəm".

Müəllif: Mina Mikayılova (Milli.Az müxbir)