Şirin yemiş seçmək üçün əsas əlamətlər

Yay mövsümünün ən sevilən meyvələrindən biri olan yemiş həm dadı, həm də faydalı xüsusiyyətləri ilə seçilir. Tərkibindəki yüksək su miqdarı sayəsində isti havalarda orqanizmin maye balansını qorumağa kömək edir, lif isə həzm sisteminin fəaliyyətini dəstəkləyir. Lakin bazardan həqiqətən şirin və yetişmiş yemiş seçmək hər zaman asan olmur.

Milli.Az xəbər verir ki, yemişin yetişdiyini yalnız rənginə və ətrinə görə deyil, həm də saplağına baxaraq müəyyən etmək mümkündür. Onların bildirdiyinə görə, saplağın meyvəyə birləşdiyi hissədə dairəvi çat əmələ gəlibsə, bu, yemişin tam yetişdiyini göstərən ən etibarlı əlamətdir. Saplaq artıq qopubsa, bu da meyvənin tam yetişmiş olduğunu göstərir.

Yaşıl zolaqlar sizi narahat etməsin

Mütəxəssislər qeyd edirlər ki, sarı rəngli, qabığı qabırğalı yemişlərdə qabırğalar arasındakı zolaqlar bəzən yaşıl rəngdə qala bilər. Lakin bu, meyvənin yetişmədiyi anlamına gəlmir. Belə hallarda da əsas diqqət saplağa yönəldilməlidir. Əgər saplaq hissəsində çat yaranıbsa, həmin yemiş artıq yeməyə hazır hesab olunur.

Fermerlər yetişməmiş məhsul yığmırlar

İstehsalçılar bildirirlər ki, onlar yemişləri heç vaxt yetişməmiş halda yığmırlar. Hətta sonradan yetişə bilən sortlarda belə məhsul yalnız tam yetişdikdən sonra toplanır. Fermerlər hər gün məhsul yığdıqlarını və bunun sayəsində alıcıların hər dəfə yumşaq, şirəli və şirin yemiş əldə etdiklərini vurğulayırlar.

Mütəxəssislərdən digər qidalanma tövsiyələri

Dietoloqlar bildirirlər ki, beyin, ürək və bağırsaq sağlamlığı üçün ən faydalı qəlyanaltılardan biri yunan yoqurtudur. Onun əsas üstünlüyü bağırsaq mikroflorasını dəstəkləyən probiotiklərlə zəngin olmasıdır.

Bundan başqa, mütəxəssislər badamın gündəlik qəbul normasına da aydınlıq gətiriblər. Onların sözlərinə görə, badam yağla zəngin olsa da, aparılan tədqiqatlar onun ölçülü miqdarda qəbul edildikdə çəki artımına səbəb olmadığını göstərir. (lent.az)

Müəllif: Ülkər Vəliyeva (Milli.Az redaktor)