Yayın istisində evdə hazırlaya biləcəyiniz sərinləşdirici içkilər

Yayın isti günlərində orqanizmin kifayət qədər maye qəbul etməsi sağlamlığın qorunması üçün vacibdir. Şəkər və konservantlarla zəngin mağaza qazlı içkiləri əvəzinə, təbii məhsullarla hazırlanan ev içkiləri həm susuzluğu yatırır, həm də orqanizmə fayda verir. Mövsümi meyvələr, təzə göyərti və sadə inqrediyentlərlə hazırlanan bu içkilər vitaminlərlə zəngindir və yay günlərində əla seçim hesab olunur.

Milli.Az lent.az-a istinadən bu 5 sərinləşdirici içkini təqdim edir:

Nanəli klassik limonad

Bu klassik içki təravətli sitrus dadı ilə hər zaman sevilən seçimlərdən biridir.

Lazım olanlar

4 iri limon

1 litr soyuq su

3-4 xörək qaşığı bal və ya şəkər

Bir ovuc təzə nanə

Buz

Süfrəyə vermək üçün limon dilimləri

Hazırlanması

Limonların şirəsini sıxaraq soyuq su ilə qarışdırın. Bal və ya şəkəri əlavə edib tam həll olana qədər qarışdırın. Nanə yarpaqlarını əlinizlə yüngülcə əzərək aromatını çıxarın və buzla birlikdə limonadın içinə əlavə edin. Limon dilimlərini də saldıqdan sonra içkini 20-30 dəqiqə soyuducuda saxlayın.

Çiyələkli və reyhanlı limonad

Şirin çiyələk və ətirli reyhanın vəhdəti yay üçün fərqli və zərif dad təqdim edir.

Lazım olanlar

250 qram yetişmiş çiyələk

3 limon

1 litr qazlı mineral su

2-3 xörək qaşığı bal

6-8 reyhan yarpağı

Buz

Hazırlanması

Çiyələyi blenderdə püre halına gətirin. İstəsəniz, daha duru içki əldə etmək üçün süzgəcdən keçirə bilərsiniz. Püreni limon şirəsi, bal və mineral su ilə qarışdırın. Reyhan yarpaqlarını və bol buz əlavə edərək süfrəyə verin.

Ev üsulu şaftalılı buzlu çay

Sərin buzlu çay günün ortasında həm təravətləndirir, həm də yüngül enerji verir.

Lazım olanlar

2 paket qara çay

2 yetişmiş şaftalı

1 litr su

2 xörək qaşığı bal

Yarım limonun şirəsi

Buz

Hazırlanması

Qara çayı dəmləyin və tam soyumasını gözləyin. Şaftalıların tumunu çıxarıb blenderdə bal və limon şirəsi ilə birlikdə püre halına gətirin. Soyumuş çayı meyvə püresi ilə qarışdırın və buz əlavə edərək süfrəyə verin.

Qarpız, laym və nanə ilə hazırlanan sərinləşdirici içki

Su tərkibi yüksək olan bu içki isti havalarda maye balansını bərpa etməyə kömək edir.

Lazım olanlar

600 qram tumsuz qarpız

1 laymın şirəsi

Bir neçə budaq nanə

Buz

Hazırlanması

Qarpızı blenderdə əzin. Laym şirəsini və nanə yarpaqlarını əlavə edib bir neçə saniyə də yenidən qarışdırın. İçkini hazırlandıqdan dərhal sonra bol buzla birlikdə için.

Xiyar və zəncəfilli detoks limonadı

Yüngül acılığa malik bu içki həm təravətləndirir, həm də fərqli dad sevənlər üçün ideal seçimdir.

Lazım olanlar

1 iri xiyar

2 limon

1 litr qazsız su

2-3 santimetr təzə zəncəfil

2 xörək qaşığı bal

Hazırlanması

Xiyarı nazik dairələr şəklində doğrayın. Zəncəfili xırda sürtgəcdən keçirin. Limonların şirəsini sıxın. Bütün inqrediyentləri şüşə sürahiyə əlavə edib üzərinə su və bal tökün. Yaxşı qarışdırın və içməzdən əvvəl soyuducuda sərinləşdirin.

Yayda susuzluğu yatıran digər faydalı içkilər

Mütəxəssislərin fikrincə, zərdab uzun illər əvvəl təkcə pendir hazırlanmasının əlavə məhsulu deyil, həm də faydalı içki kimi istifadə olunurdu. Son illərdə bu ənənəvi məhsula maraq yenidən artır. Zərdab bağırsaqların fəaliyyətini dəstəkləyir və isti havalarda orqanizmi sərinləşdirir. Zərdab əldə etmək üçün təzə süd bir-iki gün isti mühitdə saxlanılır.

Bu müddətdə təbii bakteriyalar laktozanı süd turşusuna çevirərək südü qatığa bənzər vəziyyətə gətirir. Daha sonra qarışıq yüngül şəkildə qızdırılır və nəticədə kəsmik kütləsi mayedən ayrılır. Qalan maye isə vitamin və minerallarla zəngin zərdab olur.

Bundan başqa, yay aylarında orqanizmi sürətlə bərpa edən içkilərdən biri də kokos suyudur. Bir çox insan adi su və ya şirin qazlı içkilərə üstünlük versə də, kokos suyu təbii elektrolitlərlə zəngin olduğundan susuzluğu tez yatırır, fiziki yüklənmədən və isti havadan sonra bədənin maye balansını bərpa etməyə kömək edir. Buna baxmayaraq, bu faydalı içki hələ də geniş yayılmayıb.

Müəllif: Tural Hüseyn (Milli.Az redaktor)

Milli.Az lent.az-a istinadən bildirir ki,