Dünya

NASA Ay və Mars üçün 4 könüllü axtarır

11 İyul 2026 02:02

Baxış: 2 061

VTB-də minimal faiz dərəcəsi ilə nağd kredit 9.9%-dən

#DÜNYADA #KOSMOS #NASA

ABŞ Milli Aeronavtika və Kosmik Administrasiyası (NASA) gələcək Ay və Mars ekspedisiyalarına hazırlıq məqsədilə yeni simulyasiya layihəsinə iştirakçı qəbulu elan edib.

Milli.Az xəbər verir ki, məlumata görə, bir il davam edəcək proqram 2027-ci ilin avqust ayında Hyustondakı Conson Kosmik Mərkəzində start götürəcək. Layihənin əsas məqsədi uzunmüddətli kosmik missiyaların insan orqanizminə və psixoloji durumuna təsirini araşdırmaqdır.

Proqram çərçivəsində seçiləcək dörd nəfər əvvəlcə kosmik gəmini xatırladan xüsusi yaşayış modulunda qalacaq, daha sonra isə Mars səthini təqlid edən bazada fəaliyyət göstərəcək. İştirakçılar burada bitki yetişdirəcək, sağlamlıq göstəricilərini izləyəcək və kosmik yürüşləri imitasiya edən tapşırıqları yerinə yetirəcəklər.

Tədqiqat zamanı Marsın Yerə nisbətən daha uzun olan sutka rejiminin insanların yuxu və iş fəaliyyətinə təsiri də öyrəniləcək.

NASA bildirib ki, namizədlər 30-55 yaş aralığında olmalı, mühəndislik, biologiya, fizika və ya riyaziyyat sahəsində ali təhsilə malik olmalıdırlar. Bundan əlavə, onlar fiziki və psixoloji qiymətləndirmədən uğurla keçməlidirlər.

Müəllif: Nərmin Mahmudova (Milli.Az müxbir)