Quran öyrənməyin fəziləti

Peyğəmbər (s.a.v.v) buyurur: Həqiqətən Quran İlahi süfrədir, elə isə bacardığınız qədər ondan bəhrələnin.

Peyğəmbər (s.a.v.v) Muaz ibni Cəbələ tövsiyə edərək buyurur: "Ey Muaz! Әgər xoşbəxt insanlar kimi yaşamaq, şəhidlər kimi ölmək, məhşərdə azad olmaq qiyamət günü əmin-amanlıqda qalmaq, o günün qaranlıq və zülmətindən yaxa qurtarmaq, qızmar günlərdə kölgə və asayişdə olmaq, susuz olduğun günlərdə susuzluğunu dəf etmək, çətinliklərlə qarşılaşdığın zaman öz mövqeyini qoruyub saxlamaq, haqq yoldan uzaq düşdüyün zaman hidayət olmağını istəyirsənsə, Quranı öyrən. O, mehriban Allahı yad etməkdə ən gözəl vasitə,Şeytanın müqabilində böyük zireh və əməllərin ölçülməsi üçün ən yaxşı meyardır.

İslam Peyğəmbəri (s.a.v.v): Sizlərdən biriniz digərinizə Quran ayələrindən birini öyrədərsə, həmin şəxsin ağasına çevrilər. Elə isə onlara qarşı hörmətsizlik etməməli və hüquqlarını taptalamamalıdır. Belə bir kobudluğa yol verən şəxslər, sanki islamın dayaqlarından birini viran etmiş olarlar.

Allahın evlərindən birinə yığışıb Quranı öyrənən şəxslərə Allahın rəhmət və bərəkəti nazil olar və mələklər onları əhatə edərək xoş sözlərlə yad edərlər.

Allah Təala qiyamət günü övladına Quran öyrədən şəxslərin boynuna elə bir boyunbağı salar ki, gözəlliyindən məhşərdə hamını heyran edər.

İmam Әli (ə.s) buyurur: Övladın atanın üzərində olan haqqı ona gözəl ad qoymaq, tərbiyə etmək və Quran öyrətməkdən ibarətdir.

Quran oxumağı öyrənin, çünki o, ən gözəl kəlamdır; onun məna və məfhumunu dərk edib yaxşı düşünüb daşının,çünki o, qəlblərə bahar gətirir; ondan şəfa istəyin, çünki o, canların şəfasıdır; onu gözəl oxuyun, çünki orada ən gözəl əhvalatlar söylənilir.

İmam Sadiq (ə.s) buyurur: Yaxşı olar ki, möminlər dünyalarını dəyişməyənədək Quran öyrənsinlər və ya dünyalarını dəyişdikləri zaman Quran öyrənməklə məşğul olsunlar.

Milli.Az