Bəxt və uğur üçün hər gün deyilməli olan 5 söz

Sözlərin insan psixologiyasına təsiri uzun müddətdir müzakirə olunur. Gün ərzində istifadə edilən ifadələrin düşüncə tərzini, əhval-ruhiyyəni və davranışları formalaşdıra biləcəyi bildirilir.

Milli.Az xəbər verir ki, bəzi sözlər müsbət düşüncələri dəstəkləmək və insanın özünə baxışını gücləndirmək məqsədilə gündəlik həyatda daha sıx istifadə oluna bilər.

"Təşəkkür edirəm" ifadəsi minnətdarlıq duyğusunu gücləndirən sözlərin başında gəlir. İnsanın sahib olmadığı şeylərə diqqət yetirmək əvəzinə həyatındakı gözəl detalları fərq etməsinə kömək edə bilər. Sevilən birinin dəstəyi, gözəl keçən bir gün, xoş görüş və ya insanın sevdiyi işlə məşğul ola bilməsi kimi kiçik detallar üçün şüurlu şəkildə şükür etmək müsbət baxış bucağını dəstəkləyə bilər.

"Bacarmaram" düşüncəsi insanın fərqində olmadan özünə sərhədlər qoymasına səbəb ola bilər. Bunun əvəzinə "Bacara bilərəm" demək insanın yeni addımlar atmaq mövzusunda özünə icazə verməsini asanlaşdıra bilər. Bu ifadə xüsusilə çətin görünən bir işə başlamazdan əvvəl insanın öz potensialına fokuslanmasına kömək edə bilər.

"İnanıram" sözü insanın özünə və hədəflərinə qarşı inamını ifadə etməyin yollarından biridir. "Qabiliyyətlərimə inanıram" və ya "Bunun öhdəsindən gələ biləcəyimə inanıram" kimi cümlələr müsbət daxili dialoqun bir hissəsi kimi istifadə oluna bilər. Bu cür ifadələr təkbaşına bir həll yolu təqdim etməsə də, insanın əhval-ruhiyyəsinə və hərəkətə keçmək istəyinə müsbət təsir göstərə bilər.

"Sevgi" sözü yaxınlıq, qəbul olunma, mərhəmət və bağlılıq kimi müsbət duyğuları çağrışdırır. Buna görə də gündəlik ünsiyyətdə səmimi şəkildə istifadə edilməsi insanın həm özü, həm də ətrafı ilə qurduğu münasibətə müsbət töhfə verə bilər. Sevildiyiniz insanlara duyduğunuz gözəl hissləri açıq şəkildə ifadə etmək qədər insanın özünə qarşı da şəfqətli dil istifadə etməsi böyük əhəmiyyət daşıyır.

Beşinci söz isə "uğur"dur. Günə başlayarkən və ya vacib bir işə girişməzdən əvvəl bu sözü işlətmək insanın çatmaq istədiyi nəticəyə fokuslanmasına kömək edə bilər. "Uğura hazıram" kimi ifadələr hədəfləri xatırladan və insanın özünü görüləcək işə hazırlamasını təmin edən müsbət daxili danışıq nümunəsi kimi qiymətləndirilir.

Müəllif: Ülkər Vəliyeva (Milli.Az redaktor)