Gəncədə "Divani-hikmət ədəbi məclisi" bərpa edilib

Gəncədə fəaliyyəti Mirzə Şəfi Vazehin adı ilə birbaşa bağlı olan "Divani-hikmət ədəbi məclisi" bərpa edilib. Milli.Az Kəpəz TV-yə istinadən xəbər verir ki, bu addım gəncəli müdrikin 220 illik yubileyi ərəfəsində şair-publisistin xatirəsinə hörmət və ehtiram əlaməti olaraq atılıb.

Azərbaycan Yazıçılar Birliyinin üzvü Sahib İbrahimlinin təşəbbüsü, Gəncə Şəhər İcra Hakimiyyətinin dəstəyi ilə bərpa edilən "Divani-Hikmət" məclisinin üzvləri Gəncə şəhər Mərkəzi Kitabxanasının oxu zalında toplaşaraq məclisin rəsmi fəaliyyətini elan ediblər. Bura toplaşan qələm ustaları çıxış edərək Mirzə Şəfi, onun həyatı və yaradıcılığı barədə söhbət açıb, dahi şairin 220 illik yubileyi münasibəti ilə şəhərdə keçirilən və təşkili nəzərdə tutulan tədbirlər haqqında müzakirələr aparıblar.

Sahib İbrahimli, "Divani-Hikmət" ədəbi məclisinin üzvü: "Bilirsiniz ki, Azərbaycanın müxtəlif bölgələrində müxtəlif adda ədəbi məclislər fəaliyyət göstərib. Mirzə Şəfinin yaratdığı ədəbi məclis bu məclislər arasında öz səviyyəsi və yaradıcılıq məramı ilə seçilib. Bu ədəbi məclis yerli ədəbi qüvvələrin inkişafına, onların istedadlarının formalaşmasına çox böyük təsir gösərib".

Gəncəli müdrikin vəfatından sonra bir müddət fəaliyyətini davam etdirən ədəbi-məclis, rus işğalı ilə bağlı olaraq XIX əsrin sonlarında dağılıb. Bildirilib ki, yüz ildən artıq bir zaman kəsiyində toplanmayan "Divani-Hikmət"in bəpa edilməsi, Gəncənin mədəni həyatında önəmli bir hadisədir.

Sahib İbrahimli: "Biz fürsətdən istifadə edib, bölgənin bütün yaradıcı insanlarını "Divani-Hikmət" məclisinə dəvət edirik. Yaşından, mövqeyindən asılı olmayaraq, cavan, orta və yaşlı nəslin nümayəndələrini dəvət edirik. Onlar ədəbi məclis ətrafında birləşsinlər ki, bizim ədəbiyyatımız bu məclisin köməkliyi ilə bir az da püxtələşsin, formalaşsın, inkişaf etsin".

"Divani-Hikmət" ədəbi məclisinin üzvləri ayda iki dəfə toplaşaraq, ədəbi müzakirələr, yeni qələmə alınan nəzm və nəsr əsərləri arasında ən yaxşılarını müəyyən etmək üçün məsləhətləşmələr aparacaqlar.

Milli.Az