Dünya

İranın yeni planı: Husilər strateji boğazı bağlaya bilər

16 İyul 2026 17:50

Baxış: 313

VTB-də minimal faiz dərəcəsi ilə nağd kredit 9.9%-dən

İranın Yəməndəki husilərə ABŞ-nin İranın enerji infrastrukturuna zərbələr endirəcəyi təqdirdə Bab-əl-Məndəb boğazını bağlamağı tapşırdığı iddia olunur.

Milli.Az xəbər verir ki, "Reuters" agentliyi məlumatı üç anonim mənbəyə istinadən yayıb.

Mənbələrin bildirdiyinə görə, məsələ İran rəhbərliyi ilə müzakirə edildikdən sonra husilərə müvafiq göstəriş verilib. Lakin bu tapşırığın ABŞ Prezidenti Donald Trampın İranın enerji obyektlərinə mümkün zərbələrlə bağlı açıqlamalarından əvvəl, yoxsa sonra verildiyi məlum deyil.

Husilərə yaxın mənbə bildirib ki, Bab-əl-Məndəb boğazı ətrafında raket və pilotsuz uçuş aparatları yerləşdirilib. Boğazın bağlanması ilə bağlı hazırlıqların başa çatdığı və yalnız əmrin verilməsinin gözlənildiyi qeyd olunub.

Qeyd edək ki, Bab-əl-Məndəb boğazı Qırmızı dənizi Ədən körfəzi və Ərəb dənizi ilə birləşdirən mühüm strateji dəniz keçidlərindən biridir. Süveyş kanalı ilə birlikdə bu marşrut Avropa və Asiya arasında qlobal yükdaşımaların əsas hissəsini təmin edir.

Dünya dəniz ticarətinin təxminən 12 faizinin keçdiyi bu boğazda hər hansı məhdudiyyət neft və mayeləşdirilmiş təbii qaz tədarükünə, eləcə də beynəlxalq ticarət axınlarına ciddi təsir göstərə bilər.

Müəllif: Malik Məlikov (Milli.Az redaktor)