Dünya

Asteroid Yerlə toqquşa bilər - Rusiyalı alim

1 İyul 2026 10:02

Baxış: 862

VTB-də minimal faiz dərəcəsi ilə nağd kredit 9.9%-dən

#KOSMOS

Hazırda məlum olan bütün göy cisimləri arasında Yer üçün ən böyük potensial təhlükə mənbələrindən biri "2024 YR4" asteroididir. Mütəxəssislərin fikrincə, onun ölçüləri və hərəkət trayektoriyası elmi ictimaiyyətdə ciddi maraq və diqqət doğurur.

Milli.Az oxu.az-a istinadən xəbər verir ki, bu barədə TASS-a müsahibəsində astronomiya sahəsi üzrə mütəxəssis Yevgeni Burmistrov məlumat verib.

Alimin hesablamalarına əsasən, 22 dekabr 2032-ci ildə sözügedən asteroidin Yerlə toqquşması nəzəri cəhətdən mümkündür. Onun sözlərinə görə, belə bir kosmik cismin Yerə düşəcəyi təqdirdə, dağıntı zonası episentrdən təxminən 30 kilometr radiusunda olan ərazini əhatə edə bilər ki, bu da böyük bir meqapolisin sahəsinə bərabərdir.

Bununla belə, astronom vurğulayıb ki, hazırda bu ssenarinin reallaşma ehtimalı son dərəcə aşağıdır və cəmi 0.0017 faiz təşkil edir.

Burmistrov əlavə edib ki, asteroidin uçuş trayektoriyası ilə bağlı daha dəqiq məlumatlar yalnız bir neçə ildən sonra əldə olunacaq. "2024 YR4" asteroidinin Yerə növbəti yaxınlaşması 2028-ci ildə gözlənilir və məhz bundan sonra alimlər təhlükənin real səviyyəsi ilə bağlı proqnozlarını yeniləyə biləcəklər.

Onun sözlərinə görə, həmin vaxta qədər aparılan bütün qiymətləndirmələr ilkin xarakter daşıyır. Xatırladaq ki, 2025-ci ilin sentyabrında beynəlxalq tədqiqatçılar qrupunun hesabatı dərc olunmuşdu. Həmin sənəddə kritik zərurət yaranacağı təqdirdə "2024 YR4" asteroidinin nüvə silahı vasitəsilə məhv edilməsinin mümkün ssenarilərdən biri ola biləcəyi qeyd edilsə də, bu variant hazırda yalnız nəzəri ehtimal kimi qiymətləndirilir.

Müəllif: Tural Hüseyn (Milli.Az redaktor)