Fransada X şirkətinin ofisində axtarış aparılır

Paris prokurorluğu 2025-ci ilin yanvarında platformanın alqoritmlərinin fəaliyyəti ilə bağlı başlanmış istintaq çərçivəsində Fransada X sosial şəbəkəsinin ofisində axtarışların aparıldığını açıqlayıb.

Milli.Az xəbər verir ki, bu barədə BFMTV məlumat yayıb.

Axtarışlar Paris prokurorluğunun kibercinayətkarlıqla mübarizə bölməsi tərəfindən həyata keçirilir, prosesə Avropol da cəlb olunub.

Qeyd edək ki, X sosial şəbəkəsi milyarder İlon Maska məxsusdur.

Paris prokurorluğunun açıqlamasında bildirilir ki, "2025-ci ilin yanvarında başlanmış istintaq çərçivəsində axtarış Paris prokurorluğunun kibercinayətkarlıqla mübarizə bölməsi, Jandarmiyanın Milli Kibervahidi və Avropolun birgə iştirakı ilə aparılıb". Prokurorluq əlavə edib ki, bundan sonra sosial şəbəkələrdə məlumat yaymayacaq. Bu barədə Le Monde nəşri sitat gətirib.

Xatırladaq ki, 2025-ci ilin yanvarında Fransa prokurorluğu X platformasının alqoritmlərindən xarici müdaxilə məqsədilə istifadə edilməsi ilə bağlı ittihamlardan sonra istintaqa başlayıb. Buna Fransa parlamentinin bir deputatı və yüksək vəzifəli məmur tərəfindən verilmiş iki şikayət əsas olub. 2025-ci ilin iyulunda iş Fransa polisinə ötürülüb. Həmin ay X şirkəti Fransa hakimiyyətinin ittihamlarını rədd edərək istintaqı "siyasi motivli" adlandırıb.

Paris hakimiyyəti şirkətdən platformanın tövsiyə alqoritminə, həmçinin istifadəçilərin platformadakı bütün paylaşımları ilə bağlı məlumatlara çıxış tələb edib.

Bundan əlavə, Avropa İttifaqı qurumlarının diqqətini İlon Maskın xAI şirkəti tərəfindən yaradılmış Grok çat-botu da cəlb edib. Avropa Komissiyası insanların fotolarının dəyişdirilməsinə imkan verən bu süni intellekt aləti ilə bağlı araşdırmaya başlayıb. Məlumata görə, alət şəkillərin redaktə olunması və qeyri-etik məzmunun yaradılması riskləri ilə əlaqələndirilir.

Reuters-in yazdığına görə, Grok X platformasına inteqrasiya olunub və bəzi hallarda istifadəçi sorğularına uyğun olaraq uyğun olmayan görüntülər təqdim edib.

Ayxan
Milli.Az