Dünya

“Vaqner” bölmələrini Baxmutdan çıxarır: Ukraynanın əks-hücumu başladı

25 May 2023 11:31

Baxış: 1 200

VTB-də minimal faiz dərəcəsi ilə nağd kredit 10.49%-dən

"Vaqner" muzdlu qrupu öz bölmələrini Baxmutdan çıxarmağa başlayıb.

Milli.Az APA-ya istinadən bildirir ki, bu barədə "Vaqner"in rəhbəri Yevgeni Priqojin Telegram kanalında paylaşılan videoda bildirib.

Görüntülərdə Priqojin döyüşçülərinə istirahət edərək növbəti tapşırıqlara hazırlaşacaqlarını deyir.

Qeyd edək ki, Yevgeni Priqojin ötən gün müsahibəsində Baxmutda 10 mini keçmiş məhbus olmaqla ümumilikdə 20 min döyüşçü itirdiyini açıqlayıb.

Bu arada, Prezident Vladimir Zelenskinin administrasiyası Ukraynanın əks-hücuma başladığını təsdiqləyib.

Bu barədə Ukrayna prezident administrasiyası rəhbərinin müşaviri Mixail Podolyak İtaliyanın "Rai" telekanalına müsahibəsində bildirib.

O deyib ki, Ukrayna Silahlı Qüvvələrinin əks-hücum əməliyyatı bir neçə gündür ki, davam edir.

"Artıq bir neçə gündür əks-hücum gedir, sərhədin 1500 kilometrliyində gərgin müharibə gedir, hücumlar artıq başlayıb", - Podolyak bildirib.

Podolyak Ukraynanın Rusiya ərazisinə qarşı Qərb silahlarından istifadə etməyəcəyini, lakin Krımı və Donbası azad etmək üçün Rusiya ordusuna qarşı bu silahlardan istifadə ediləcəyini vurğulayıb.

"Biz Rusiya ərazisini vurmaq istəmirik, sizin verdiyiniz silahlardan Moskvanın işğal etdiyi ərazilərdə, həmçinin Donbas və Krımdakı Rusiya mövqelərini məhv etmək üçün istifadə edəcəyik", - Podolyak deyib.

Milli.Az