Borrell Rusiyaya qarşı yeni sanksiyaların anonsunu verib

Avropa İttifaqı (Aİ) Rusiya Prezidentinin qismən səfərbərliyin elan olunması ilə bağlı qərarına cavab olaraq Moskvaya qarşı yeni sanksiyalar hazırlayacaq və Ukraynaya hərbi dəstəyini artıracaq.

Milli.Az APA-ya istinadən bildirir ki, bunu Aİ-nin Xarici siyasət və Təhlükəsizlik məsələləri üzrə Ali Nümayəndəsi Cozep Borrell jurnalistlərə bildirib.

"Biz Ukraynaya silah verməklə hərbi dəstəyimizi davam etdirəcəyik, bu yardımı artıracağıq və Rusiyaya qarşı yeni məhdudlaşdırıcı tədbirlər qəbul edəcəyik", - Borrell Nyu-Yorkda BMT Baş Assambleyası çərçivəsində Aİ-nin yüksək səviyyəli diplomatlarının fövqəladə iclasının yekunlarına dair jurnalistlərə bildirib.

O vurğulayıb ki, Rusiyanın bu addımı Aİ-nin Ukraynanın yanında olmaq və Ukraynanın ərazi bütövlüyünü və suverenliyini müdafiə etmək qabiliyyətinə hərtərəfli dəstək əzmini dəyişməyəcək.

Borrell Aİ-nin Avropa Sülh Fondu vasitəsilə Ukraynaya silah çatdırılmasını maliyyələşdirməyə davam edəcəklərini təsdiqləyib.

Konkret detalları açıqlamayan Borrellin sözlərinə görə, Rusiya iqtisadiyyatına təsir edəcək yeni sanksiyalar paketi müzakirə olunacaq ki, bura da texnologiya sahəsi ilə bağlı sanksiyalar daxil olacaq və eyni zamanda, yeni şəxslərin də sanksiyaya məruz qalması gözlənilir.

"Politico"nun məlumatına görə isə sanksiyalar planına Rusiya neftinin qiymətinin məhdudlaşdırılması və Rusiyadan lüks malların idxalına qadağa daxildir.

Aİ səfirlərinin sentyabrın 23-də sanksiyalarla bağlı detalları müzakirə edəcəyi gözlənilir.

Qeyd edək ki, Rusiya Ukraynaya qarşı müharibəyə başlayandan bəri blok Ukraynaya öldürücü silahlar, həmçinin fərdi qoruyucu vasitələr, ilk yardım dəstləri və yanacaq daxil olmaqla ümumilikdə 2,5 milyard avro (2,5 milyard dollar) hərbi yardım göstərib.

Aİ həmçinin Rusiyaya qarşı yeddi sanksiya paketi tətbiq edib.

Milli.Az