Daha bol məhsul üçün yayda budanmalı olan 7 meyvə ağacı

Mütəxəssislər alma, şaftalı və bir çox digər meyvə ağaclarında yay ortasında ediləcək strateji toxunuşların məhsuldarlığı ikiqat artırdığını və meyvələri daha şirin etdiyini açıqlayıblar.

Milli.Az xəbər verir ki, bağdan təzə meyvə yığmağın ləzzəti heç nə ilə müqayisə olunmaz, lakin bol və keyfiyyətli məhsulun yolu düzgün vaxtda düzgün budamadan keçir. Qış budamasından fərqli olaraq, yay budaması ağacın həddindən artıq böyüməsini yavaşladır, günəş işığının alt budaqlara çatmasını təmin edir və enerjini birbaşa meyvə istehsalına yönəldir.

Şaftalı ağaclarını məhsul yığımından dərhal sonra budamaq ağacın formasını qorumaq üçün idealdır. "Su budaqları" deyilən, meyvə verməyən güclü dik budaqlar mütləq çıxarılmalıdır. Bir-birini kəsən və ya içəriyə doğru böyüyən budaqlar təmizlənərək günəş işığının birbaşa meyvələrə çatması təmin edilməlidir.

Armud: Yay aylarında ediləcək yüngül toxunuşlar meyvənin ölçüsünə, şirinliyinə və rənginə müsbət təsir edir. Dik su budaqlarını və kök pöhrələrini təmizləyin. Unutmayın, bu dövrdə ağac tacının ən çox 20%-ni kəsməlisiniz; ağır budamalar ağacın yuxuda olduğu qış dövründə edilməlidir.

Alma: Yayda edilən budamalarda arzuolunmaz zoğların yenidən çıxma ehtimalı daha aşağıdır. Bu sayədə ağacın enerjisi sərf olunmur və gələn yazda çiçəklənmə təşviq edilir. Yeni və güclü dik budaqları gövdənin dibindən kəsib çıxarın, ağacın mərkəzinə işıq girməsi üçün sıx budaqları seyrəldin.

Albalı/Gilas: Bu ağaclar meyvələr yığıldıqdan dərhal sonra, yəni yay ortasından sonuna doğru budanmalıdır. Ölü, zədələnmiş və ya çarpaz budaqları çıxarın; dik zoğları qısaldın. Ağacın orta hissəsini seyrəldərək hava axınını artırın, lakin böyük struktur kəsimlər üçün yazı gözləyin.

Ərik kimi çəyirdəkli meyvələr qışın nəmli havasında budandıqda ölümcül göbələk xəstəliklərinə qarşı müdafiəsiz qalır. Quru yay aylarında budama etmək isə infeksiya riskini sıfıra endirir. Çarpaz və ya həddindən artıq sıx budaqları budayaraq hava axınını yaxşılaşdırın.

Əncir: Yay ortasında ediləcək yüngül seyrəltmələr ağacın enerjisini yetişməkdə olan əsas məhsula verməsini təmin edir və meyvələrin daha tez şirinləşməsinə kömək edir. Ağacın altından çıxan "obur budaqları" tamamilə təmizləyin. İçəridə qalan, günəş işığını və hava axınını kəsən sıx yarpaqlı budaqları yüngülcə seyrəldin.

Alça ağaclarında budamaya ehtiyatlı və yüngül yanaşılmalıdır. Budama üçün ən ideal vaxt məhsul yığımından dərhal sonradır. Ağacın enerjisini meyvəyə yönəltmək üçün yalnız şaquli olaraq böyüyən güclü budaqları kəsin. Beləcə ağacınız güclü və açıq bir quruluşa qovuşar.

Yay budaması ağacın enerjisini düzgün idarə etmək və meyvə keyfiyyətini artırmaq üçün kritik əhəmiyyət daşıyır. Lakin unutmayın ki, yayda ağır budama etmək ağacı stressə sala bilər, buna görə də hər zaman "az və qərarında" prinsipi ilə hərəkət etmək lazımdır.

Müəllif: Ülkər Vəliyeva (Milli.Az redaktor)