Cəmiyyət

Gözündə linza ilə çimərliyə gedənlərin nəzərinə

30 İyun 2026 16:49

Baxış: 2 379

VTB-də minimal faiz dərəcəsi ilə nağd kredit 9.9%-dən

Kontakt linzalarla durğun sularda çimmək təhlükəli ola bilər.

Milli.Az xəbər verir ki, rusiyalı oftalmoloq Aleksey Yeqorov kontakt linzalardan istifadə edən şəxslərə vacib xəbərdarlıq edib. Onun sözlərinə görə, linzalarla gölməçə və digər durğun su hövzələrində çimmək göz sağlamlığı üçün ciddi risk yarada bilər.

Mütəxəssis bildirib ki, durğun sularda müxtəlif mikroorqanizmlərin, xüsusilə də akantameba adlı mikroskopik parazitin yaşaması üçün əlverişli şərait mövcuddur. Bu parazit kontakt linzanın altına keçərək çoxala bilər və nəticədə müalicəsi olduqca çətin olan akantameba keratiti adlı göz xəstəliyinə səbəb ola bilər.

Həkim bu təhlükədən qorunmaq üçün çimərkən kontakt linzalardan istifadə etməməyi tövsiyə edir. Əgər linzalarla suya girmək zərurəti yaranarsa, çimdikdən dərhal sonra onları çıxarmaq və gözləri xüsusi antiseptik məhlulla təmizləmək məsləhət görülür.

Aleksey Yeqorov qeyd edib ki, kontakt linzalar istifadə qaydalarına düzgün əməl olunduğu halda təhlükəsiz hesab edilir və insanların eynəksiz rahat görməsinə imkan yaradır. Bununla belə, gözdə iltihab, infeksiya və ya buynuz qişasında zədə olduğu hallarda linzalardan istifadə etmək məsləhət görülmür və hətta qəti qadağandır.

Müəllif: Aysel Əkbər (Milli.Az müxbir)