Teymur Rəcəbov 3-cü yer uğrunda görüşə qələbə ilə başlayıb - YENİLƏNİR

"Champions Chess Tour" seriyası çərçivəsində "Opera Euro Rapid" turnirinin üçüncü mərhələsində Azərbaycan şahmatçısı Teymur Rəcəbov fransalı Maksim Vaşye-Laqrav ilə üçüncü yer uğrunda ilk qarşılaşmanı keçirib.

Milli.Az Trend-ə istinadən bildirir ki, şahmatçımız fransalı rəqibi ilə ilk partiyanı heç-heçə ilə başa vursa da, ikinci partiyada inamlı qələbə qazanıb. Sonrakı oyunda rəqibinə məğlub olan şahmatçımız son partiyada üstün oyun nümayiş etdirməklə ümumi hesabda irəli çıxıb. Beləliklə, birinci matçda T.Rəcəbov 2,5:1,5 hesab ilə qələbə qazanıb.

Qeyd edək ki, fevralın 14-də cavab oyunları keçiriləcək. İki gün ərzində keçiriləcək oyunlarda qalib müəyyənləşməsə tay-breyk oynanılacaq.

Bu gün, həmçinin final oyununun birinci matçında hazırkı dünya çempionu, norveçli Maqnus Karlsen ABŞ təmsilçisi Uesli So ilə heç-heçə edib.

Xatırladaq ki, Teymur Rəcəbov "Champions Chess Tour" seriyası çərçivəsində keçirilən ikinci - "Airthings Masters" turnirinin finalında Ermənistan təmsilçisi Levon Aronyanı məğlub edərək yarışın qalibi olub.

21:52

"Champions Chess Tour" çərçivəsində keçirilən "Opera Euro Rapid" turnirində həlledici qarşılaşmalara bu gün start veriləcək.

Milli.Az apasport.az-a istinadən bildirir ki, mükafat fondu 100 min ABŞ dolları olan yarışın səkkizinci günündə final və 3-cü yer uğrunda ilk matçlar keçiriləcək.

Azərbaycan şahmatçısı Teymur Rəcəbov üçüncülük uğrunda qarşılaşmaya çıxacaq. O, fransalı Maksim Vaşye-Laqravla üz-üzə gələcək. Qrossmeysterlər dörd partiyada mübarizə aparacaq.

Yarımfinalda təmsilçimizi məğlub edən ABŞ şahmatçısı Uesli So və norveçli dünya çempionu Maqnus Karlsen isə finalda görüşəcək. Hər iki cütdə ikinci matç sabah baş tutacaq.

Qeyd edək ki, görüşlər Bakı vaxtı ilə saat 20:00-da başlayacaq.

"Opera Euro Rapid"
3-cü yer uğrunda, ilk matç
13 fevral
20:00. Maksim Vaşye-Laqrav (Fransa) - Teymur Rəcəbov (Azərbaycan) - 0,5:1:5 (0,5:0,5, 0:1)

Milli.Az