Cəmiyyət

Orqanizmin funksiyasının 30 faizədək pozulması əlillik sayılmayacaq - VİDEO

10 İyun 2021 16:24

Baxış: 1 126

VTB-də minimal faiz dərəcəsi ilə nağd kredit 9.9%-dən

#CƏMİYYƏT #VİDEO

Əllilik bədənin funksiyasının itirilmə faizinə görə hesablanacaq.

Milli.Az Xəzər TV-yə istinadən xəbər verir ki, bu qayda Milli Məclisdə birinci oxunuşdan keçən "Əlilliyi olan şəxslərin hüquqları haqqında" qanunda öz əksini tapıb.

Milli Məclisin Əmək və sosial siyasət komitəsinin sədri Musa Quliyev bildirib ki, burada əsas məqsəd əlilliyin ekspertizasını daha da şəffaflaşdırmaq və neqativ halları aradan qaldırmaqdır.

Dünyanın bütün qabaqcıl ölkələrində bu üsuldan istifadə edilir. Orqanizmin funksiyasının 30 faizədək pozulması heç bir əlillik halı yaratmır. Orqanizmin funksiyasının 31 faizdən 60 faizə qədər pozulmasına görə indiki 3-cü qrupa uyğun, 61 faizdən 80 faizə qədər 2-ci qrupa, 81 faizdən 100 faizə qədər pozulmasına görə isə 1-ci qrupa uyğun əlillik təminatları nəzərdə tutulub.

Bu qanun qəbul edildikdən sonra Nazirlər Kabineti beynəlxalq təcrübə nəzərə alınmaqla, xəstəliklərin müxtəlif kombinasiyaları əsasında 800-ə yaxın meyarı da təsdiq edəcək.

Müharibə iştirakçıları ilə digər hadisələr zamanı sağlamlığını itirənlərin əlillik təyinatında fərq olmayacaq. Lakin pensiyalar fərqli hesablanacaq.

Daha bir dəyişiklik isə ekspertizaya daxil olan sənədlərə baxılma müddəti ilə bağlıdır. Hazırda heç bir müddət nəzərdə tutulmadığından bəzən bu sənədlərin araşdırılması bir neçə ay çəkir. Yeni qanunda isə sözügedən sənədlərə baxılması üçün 10 gün müddət nəzərdə tutulub. Əlavə müayinəyə ehtiyac olarsa, bunun üçün də 5 gün vaxt tələb olunacaq. Gələn ilin yanvarından qüvvəyə minəcək yeni qanun həmin tarixdən sonra əlillik təyin edilənlərə və təkrar müayinəyə gedənlərə şamil olunacaq.

Mövzu ilə bağlı daha ətraflı videomaterialı təqdim edirik:

Milli.Az