Cəmiyyət

"Azad olunmuş ərazilərdə 2000-dək ağac əkilib, növbəti aksiya Qubadlı və Cəbrayılda keçiriləcək" - Nazir müavini

23 Noyabr 2020 13:11

Baxış: 1 746

#DAĞLIQ QARABAĞ #EKOLOGİYA #AĞAC

Bugünədək işğaldan azad olunmuş Füzuli, Zəngilan və Ağdam rayonlarının ərazilərində əsasən Şərq çinarı olmaqla ümumilikdə 2000-dək müxtəlif cinsli ağac əkilib, 100 kq-dan artıq palıd və digər meşəcinsli ağac toxumları səpilib.

Milli.Az bildirir ki, bunu Trend-in sorğusuna cavab olaraq, Ekologiya və təbii sərvətlər nazirinin müavini Firdovsi Əliyev deyib.

Onun sözlərinə görə, növbəti ağacəkmə aksiyaları bu günlərdə Qubadlıda, Cəbrayılda keçiriləcək.

Nazir müavini əlavə edib ki, ümumiyyətlə işğaldan azad olunmuş ərazilər minalardan təmizlənib təhlükəsiz vəziyyətə gətirildikcə ağacəkmə tədbirləri bütün Qarabağ bölgəsində hissə-hissə davam etdiriləcək:

"İşğaldan azad olunmuş ərazilərdə Ekologiya və Təbii Sərvətlər Nazirliyinin əməkdaşları tərəfindən ekoloji tarazlığın bərpası istiqamətində işlər davam etdirilir. İşğalçı Ermənistan tərəfindən Qarabağ bölgəsində məhv edilmiş yaşıllıq massivlərinin yenidən bərpasına, doğma torpaqlarımıza Böyük Qayıdış təntənəsinə hər kəs böyük ruh yüksəkliyi və qələbə sevinci ilə öz töhfəsini verməyə çalışır. Noyabrın 11-dən başlayaraq işğaldan azad olunmuş və minalardan təmizlənmiş təhlükəsiz sahələrdə əsasən Şərq çinarları olmaqla ərazinin relyefinə və iqliminə uyğun müxtəlif növ ağac tingləri əkilir, palıd və digər meşəcinsli ağac toxumları səpilir, meşə örtüyünün və yaşıllıqların bərpası istiqamətində tədbirlər görülür".

Milli.Az