Metroya görə 6 ekspres avtobus xətti fəaliyyətə başlayacaq

"Bakı Metropoliteni" QSC tərəfindən xətlərin ayrılması layihəsi çəçivəsində "28 May" və "Nizami" stansiyaları arasında qatarların hərəkəti inşaat işləri bitənə qədər dayandırılacaq. "28 May" və "Nizami" stansiyaları arasında birbaşa metro əlaqəsinin olmaması səbəbindən yaranacaq  çətinliklər nəzərə alınaraq,  yerüstü nəqliyyatda əlavə dəstəkləyici tədbirlərin təşkilinə dair qərar qəbul olunub.

AYNA-dan Milli.Az-ın sorğusuna cavab olaraq bildirilib ki, AYNA tərəfindən əlavə ekspres xətlərin yaradılması və mövcud xətlərin gücləndirilməsi ilə bağlı tədbirlər görülməsi nəzərdə tutulur.

Qeyd olunub ki, layihənin icrasına başlanıldığı vaxtdan  etibarən müxtəlif istiqamətlərdə 6 yeni ekspres avtobus marşrutu istifadəyə veriləcək və bir sıra mövcud marşrut xətlərindəki nəqliyyat vasitələrinin sayı artırılacaq.

Avtobusların hərəkəti metronun iş rejiminə uyğunlaşdırılaraq saat 06:00-dan 00:00-dək davam edəcək.
Yeni ekspres xətləri bunlardır:

M1 - Metronun "Elmlər Akademiyası" və "28 May" stansiyaları arasında
M2 - Metronun "İnşaatçılar", "Nizami" və "28 May" stansiyaları arasında
M3 - Metronun "20 Yanvar", "Nizami" və "28 May" stansiyaları arasında
M4 - Metronun "20 Yanvar" və  "Koroğlu" stansiyaları arasında
M5 - Metronun "20 Yanvar" və  "Gənclik" stansiyaları arasında
M6 - Metronun "Elmlər Akademiyası" və  "Gənclik" stansiyaları arasında

Bildirilib ki, əlavə olaraq 2, 6, 7A, 9, 10, 14, 17, 18, 26, 61, 65, 79, 85, 88, 88A, 93, 133, 165,199, 202 nömrəli marşrutlarda avtobusların sayı artırılacaq və intervalı aşağı salınacaq.

Metronun bağlanması müddəti ərzində əlavə tələbat yaranacaq marşrutlarda avtobus sayının artırılması nəzərdə tutulur.

Sərnişinlər alternativ marşrutlar barədə məlumatı "AYNA MaaS" tətbiqi vasitəsilə də əldə edə bilərlər.

Layihənin icra müddətində metronun "28 May", "20 Yanvar", "İnşaatçılar" və  "Elmlər Akademiyası" stansiyalarının qarşısında könüllülər sərnişinlərə dəstək göstərəcəklər.

Müəllif: Mina Mikayılova (Milli.Az müxbir)