İllərdir səhv dəmləyirmişik: 1 ədəd əlavə etmək kifayətdir

Çayın qısa müddətdə acılaşmasından və ləzzətini itirməsindən şikayət edənlər üçün diqqətçəkən üsul gündəmə gəlib. 

Milli.Az xəbər verir ki, çayın uzun müddət təzə qalmasını təmin edən ən praktik üsullardan biri dəmliyə bir ədəd qənd əlavə etməkdir. Çaysevərlərin illərdir tətbiq etdiyi bu üsul sayəsində çayın daha gec acılaşdığı, rənginin isə daha parlaq qaldığı qeyd olunur. Dəmləmə mərhələsində çayın içinə atılan qəndin çayın daha balanslı dəmlənməsinə töhfə verdiyi bildirilir. Bu kiçik toxunuşun çayın dadını qabarıq şəkildə şirinləşdirmədiyi, lakin acılığın daha gec yaranmasına kömək etdiyi vurğulanır. Eyni zamanda çayın rənginin daha canlı və parlaq görünməsinə də dəstək olduğu ifadə edilir.

Çayın acılaşmasının səbəbi: Tanin miqdarı
Çay yarpaqları isti su ilə təmas etdikdə tanin adlanan təbii birləşmələr suya keçməyə başlayır. Yarpaqlar uzun müddət isti suyun içində qaldıqda tanin miqdarı artır. Bu da çayın tünd rəng almasına, dadının sərtləşməsinə və zamanla bayat bir aroma qazanmasına səbəb olur.

Bu səhvləri etməyin
Çayın ləzzətini uzun müddət qorumaq üçün təkcə kub şəkər əlavə etmək kifayət deyil. Mütəxəssislər çay təxminən 15-20 dəqiqə dəmləndikdən sonra yarpaqların isti su ilə təmasının kəsilməsini tövsiyə edirlər. Süzgəcli dəmlikdən istifadə etmək və ya çay qalıqlarını sudan ayırmaq acılaşmanın qarşısını alır.

Dəmləmə zamanı qaynar suyun birbaşa quru çayın üzərinə tökülməməsi də məsləhət görülür. Əvvəlcə isti suyun dəmliyə əlavə edilməsi, daha sonra çayın suyun üzərinə tökülməsi yarpaqların yanmasının qarşısını alır və aromanın daha uzun müddət qorunmasına kömək edir.

Dəmliyi odda saxlamayın
Çay dəmləndikdən sonra dəmliyi birbaşa yüksək odda saxlamaq əvəzinə, alt çaydanlıqdan qalxan buxarın hərarətində saxlamaq tövsiyə olunur. Həmçinin çini və ya şüşə dəmlikdən istifadə etmək istiliyi daha balanslı qoruyaraq çayın dadının və qoxusunun son stəkana qədər təzə qalmasını təmin edir.

Müəllif: Ülkər Vəliyeva (Milli.Az redaktor)