Tanınmış azərbaycanlı teleaparıcı: "Sevdiyim insan var..." - FOTO

Tanınmış teleaparıcı Xədicə Sənanqızının Milli.Az-a müsahibəsi.

- Necə oldu ki, aparıcı oldunuz?

- Mən əslində ixtisasca filoloqam (rus dili müəlliməsi). Uşaqlıqda ya müəllimə, ya da həkim olmağı arzulayırdım. Heç ağlıma da gəlməzdi ki, aparıcı olaram. Təsadüfən oldu desəm, yanılmaram. ANS telekanalında müsabiqə keçirilirdi. Mən də özümü sınamaq üçün həmin müsabiqədə iştirak etdim və nəticədə 280 nəfərin arasından seçilənlərdən biri oldum. Onu da deyim ki, əvvəl-əvvəl atam, anam və qardaşlarım mənim aparıcı olmağımı qətiyyən istəmirdilər. Lakin mən bu işdə mübariz oldum və inadkarlıq göstərdim. Bir neçə müddətdən sonra onları razı sala bildim.

- Aparıcılıqla yanaşı, seriallarda da rol alırsınız. Sizin üçün aparıcılıq asandır, yoxsa aktrisalıq?

- Mənə görə, aparıcılıq aktrisalığa nisbətən daha asandır. Ola bilər ki, mən bu işlə illərdir məşğul olduğum üçün mənə belə görünür.

- Dərdinizi birinci kiminlə bölüşürsünüz?

- Anamla. Demək olar ki, o, mənim ən yaxın rəfiqəmdir.

- Kimə və nəyə "yox" sözünü deyə bilmirsiniz?

- Ümumiyyətlə, "yox" sözünü demək mənim üçün həddindən artıq çətindir.

- Pulunuzu ən çox nəyə xərcləyirsiniz?

- Kosmetik vasitələrə və ətirlərə.

- Nədən boyun qaçırırsınız?

- Neqativ insanlarla ünsiyyətdə olmaqdan həmişə boyun qaçırmışam.

- Elə bir xüsusiyyətiniz varmı ki, onu heç kimdən gizlədə bilmirsiniz?

- Mən heç vaxt öz mülayimliyimi gizlədə bilmirəm. Heç kimə qarşı sərt olmağı bacarmıram. Təbii ki, bundan sui-istifadə edənlər də olur.

- Nəyin acısını yaşamaqdan qorxursunuz?

- Valideynlərimi itirməkdən çox qorxuram. Düşünürəm ki, bu itkinin acısına dözə bilmərəm.

- Sizi illərdir ki eyni saç düzümündə görürük. Haçansa dəyişiklik etmək fikriniz var?

- Hələ ki, yoxdur. Bu saç düzümü mənə yaraşır. Ətrafımdakı insanlar da bunu deyirlər. Onu da deyim ki, saçımı məktəb illərində kəsdirmişəm.

- Sevmək sizi haçansa qorxudub?

- Qətiyyən. Mən sevəndə dəlicəsinə sevirəm.

- İndi sevirsiniz?

- Bəli. Sevdiyim insan var. Münasibətlərimiz ciddidir. Ailə qurmağa hazırlaşırıq.

- Hansı insanlarla ünsiyyət qurmaqdan çəkinirsiniz?

- Qapalı və dar düşüncəli insanlarla həmsöhbət olmaq istəmirəm.

- Uzun müddət ağır xəstəlikdən əziyyət çəkmisiniz. Bəs sağalandan sonra nəyi daha yaxşı anladınız?

- Bəli, 3 ilə yaxın ağır bir xəstəlikdən əziyyət çəkdim. Çox çətin anlar yaşadım. Amma şükürlər olsun ki, indi səhhətimdə problem yoxdur. Mən sağalıb ayağa qalxandan sonra həyatı daha çox sevməyə başladım. Hətta gecələr də yatmaq istəmirdim.

- "Doktorlar" serialından niyə ayrıldınız?

- Mən "Qaynana" serialı ilə paralel "Doktorlar" serialına da çəkilirdim. Bu, əvvəlcə mümkün idi, icazəm var idi. Sadəcə olaraq, indi müqaviləyə əsasən, başqa seriallarda rol ala bilmərəm. Ona görə də hal-hazırda yalnız "Qaynana" serialına çəkilirəm.

Cavidan Abdullayev
Milli.Az