Vətənin dar gününün adamları

44 günlük Vətən müharibəsi ilə 30 illik işğala son qoyan Azərbaycan Ordusu, bu şanlı tarixi canı-qanı bahasına qazandı. Azərbaycanın mərd oğulları heç kimin gözləmədiyi belə bir qısa müddətdə Ali Baş komandanın iradəsi və qətiyyətli idarəçiliyi altında ermənilərin on illərdir qurduqları "məğlubedilməz ordu" mifini darmadağın etməklə qaysaq bağlasa da qanayan yaramızı sağaltdılar. Bu yolda canlarından keçib şəhid olanlar da oldu, sağlamlığını itirib qazi adını daşıyanlar da.

Azərbaycan xalqının bir yumruq kimi ətrafında sıx birləşdiyi Ali Baş Komandan 10 noyabr üçtərəfli bəyanatından sonra hər çıxışında bu böyük zəfərin qazanılmasında Ordusunun göstərdiyi qəhrəmanlığı hər fürsətdə xüsusi qeyd etməklə, sona qədər bu sevinci bizə yaşadan şəhid ailələrinin və qazilərin yanında olacağını qeyd edərək, qələbədəki əsas pay sahiblərinin kim olduğunu təkrar-təkrar qeyd edir. Prezident dövlətin hər zaman şəhid ailələrinin və qazilərin yanında olacağını verdiyi qərarlar, tapşırıqlar, imzaladığı sərəncamlarla sübuta yetirir. Bunun təsdiqi kimi dövlət başçısının II Qarabağ müharibəsinin bitməyindən dərhal sonra göstərişinə əsasən şəhid ailələrinin müavinətinin 300 manatdan 500 manata qaldırılması faktını göstərə bilərik. Böyük maliyyə yükü olsa da dövlətin dayanıqlılığı, uğurlu siyasəti nəticəsində buna nail olmaq mümkün oldu. Bununla paralel olaraq eyni zamanda Prezidentin tapşırığı ilə bu il şəhid ailələri və qazilər üçün daha böyük həcmdə evlərin verilməsini təmin etmək yolunda mühüm addımlar atılır. 

Dövlət başçısının göstərişi ilə məcburi köçkünlər üçün nəzərdə tutulmuş evlər də şəhid ailələrinə veriləcək. Qaçqınkomun balansında olan mənzillər Əmək və Əhalinin Sosial Müdafiəsi Nazirliyinin balansına verildi ki, bu da kifayət qədər böyük bir proqramdır. Bununla dövlət başçısı həm də II Qarabağ müharibəsinə qədər növbədə dayanan şəhid ailələrinin bu evlərə yerləşdirilməsi Vətən müharibəsində şəhid olmuş qəhrəman hərbçilərimizin yaxınlarının da bu evlərdə yerləşdirilməsi prosesini sürətləndirmiş oldu.

Bu baxımdan Prezident İlham Əliyevin 25 yanvar 2021-ci il tarixli Sərəncamı da şəhid ailələri və müharibə əlillərinə xüsusi qayğının növbəti təzahürüdür. Sərəncamla 2021-2025-ci illərdə şəhid ailələrinə və Qarabağ müharibəsi əlillərinə 11 min mənzil və fərdi evin verilməsi nəzərdə tutulub. O cümlədən, bu il ərzində 3 minədək mənzil və fərdi ev bu kateqoriyadan olan vətəndaşlara təqdim ediləcək. Müasir tələblərə uyğun yaşayış şəraiti olan mənzillərdən artıq 470-i verilib. Ümumilikdə indiyədək şəhid ailələrinə, müharibə əlilləri və onlara bərabər tutulan şəxslərə 9670 mənzil və fərdi ev verilib.

44 günlük Vətən müharibəsindən sonrakı dövrdə şəhidlərimizin ailə üzvlərini, qaziləri, müharibə əlillərinin nəzərinə sosial dəstək paketini əhatə edən - proaktiv təyinatın həyata keçirilməsi, onlara sosial-psixoloji dəstək, reabilitasiya xidmətləri və vasitələri ilə təminatı, məşğulluq məsələlərinin operativ həlli sahələrində mühüm işlər çatdırılıb. Dəstək paketinin artıq 21 mindən çox şəxsi əhatə etdiyini deyə bilərik ki, bu da kiçik rəqəm hesab edilə bilməz.

Mənzillə təmin olunan vətəndaşlar şəhid ailələri və müharibə əlillərinin rifah halının yaxşılaşdırılması, sosial təminatlarının gücləndirilməsi istiqamətində aparılan işlər bununla da yekunlaşmır. Belə ki, Əmək və Əahlinin Sosial Müdafiəsi Nazirliyi tərəfindən qazilərin sosial dəstəklə əhatə olunması istiqamətində də işlər davam etdirilir. Buna misal olaraq özünəməşğulluq proqramına cəlb edilən daha iki qazimiz Camal Alxasov və Pərvin Rzayevin biznes sahəsi üzrə lazımı avadanlıqlarla təmin edilməsini, Rauf Həsənlinin isə yaşayış yerinə yaxın olduğu nəzərə alınaraq Sumqayıt şəhərindəki Reabilitasiya Mərkəzində operator vəzifəsi işi ilə təmin olunması faktını göstərə bilərik. Qazilərin, müharibə əlillərinin işlə təmin olunması istiqamətində müxtəlif sahələr üzrə işlər davam etdirilir. Yaxın vaxtlarda daha çox qazinin işlə və özünəməşğulluq proqramı çərçivəsində biznes fəaliyyətinin qurulması məqsədi ilə müəyyən tədbirlər görülür. 

Ümid edirik ki, Dövlət Məşğulluq Agentliyi tərəfindən Vətən müharibəsi qazilərinin məşğulluğuna dəstək tədbirləri çərçivəsində onların sevdikləri işin qulpundan yapışıb, yarım qalan arzularını gerçəkləşdirmək istiqamətində mühim addım ata biləcəklər.

Şəhid ailələrinə və qazilərə yardım məqsədi ilə Prezidentin Sərəncamı ilə təsis edilən  "YAŞAT" Fondu da qısa bir zaman keçməsinə baxmayaraq kifayət qədər mühim işlər görməkdədir. Belə ki, Fond tərəfindən bu vaxta kimi onlarla qazimizin Türkiyədə müalicə olunaraq ayağa qalxmasının şahidi olmuşuq, hazırda da bu proses intensiv olaraq davam etdirilir. Eyni zamanda şəhidlərimizin hər birinin dünyaya gələn övladının adına 5000 AZN-lik bank hesabı açılır. Həmin hesaba vəsait Fonda edilən ianələr hesabına toplanmış məbləğdən köçürülür.

Həmin məbləğin üzərinə mütəmadi olaraq faiz toplanılacaq və həmin şəhid övladı 18 yaşına çatdıqdan sonra toplanan məbləği özü hesabından çıxara biləcək. Qeyd edək ki, bankla ana arasında bağlanmış müqaviləyə əsasən bəzi zəruri hallarda ana həmin vəsaiti daha tez çıxara biləcək. Həmçinin ana həmin məbləği istənilən valyutaya da dəyişə bilər. Bütün bu nüanslar təbii ki, ailənin çətinliklərini aradan qaldırmaq üçün zəruri addımlar hesab edilə bilər. 

Təhməz Əsədov
Milli.Az