"Xalqımız bir daha əmin oldu ki, cənab İlham Əliyev hansı məqamda nəyi, necə etməyi bilir"

Müasir dünyamızda beynəlxalq münasibətlər sistemində, təəssüf ki, hələ də beynəlxalq hüququn işlək mexanizmə sahib olmadığını görürük.

Bunu Milli.Az-a açıqlamasında politoloq Şəbnəm Həsənova söyləyib.

O bildirib ki, illər ərzində Dağlıq Qarabağ münaqişəsinin həll edilməməsi də bu işləməyən mexanizmin acı nəticəsi idi:

"Azərbaycan Respublikasının Prezidenti İlham Əliyev bu gün Dağlıq Qarabağı işğal tapdağından azad etmək yolunda istər səngərin, istərs siyasi arenanın, istərsə də informasiya müharibəsinin Ali Baş Komandanı olmaqla bütün dünyaya sübut edir ki, artıq tarixi və hüquqi ədaləti bərpa etməyin zamanıdır. Çünki cənab Prezident İlham Əliyev bir daha sözünün imzası qədər əhəmiyyətli olduğunu, ədalət deyilən məfhumun varlığını əyani olaraq bütün dünyaya göstərir.

Azərbaycan bu günə qədər dünya dövlətləri ilə qurduğu ikitərəfli, eyni zamanda, çoxtərəfli çərçivədə əlaqələrini beynəlxalq hüquq normaları əsasında quran, eyni zamanda bütün dünyaya sülhsevər çağırışlar edən beynəlxalq münasibətlərin etibarlı tərəfdaşıdır. Dünya dövlətlərindən, beynəlxalq təşkilatlardan illərdi lazımi təzyiq almayan və beləliklə də cəzasızlıq sindromu yaşayan işğalçı və terroru dövlət siyasəti həddinə gətirən Ermənistan daha da azğınlaşır, qudurur, özünü beynəlxalq hüquqdan xəbərsiz aparırdı. Cənab Prezident başda olmaqla, Azərbaycanın mərd oğulları sübut edir ki, artıq ədaləti bərpa etməyin vaxtı və vədəsi çoxdan yetişib.

İndiki dövrdə də istər indi döyüş meydanında qələbələr qazanmağımız, istərsə də bu günlər ərzində bütün ölkələrlə siyasi danışıqlarda haqlı mövqeyimizi çatdıra bilməyimiz Prezident İlham Əliyevin siyasi xadim kimi müdrik fəaliyyəti, ötən dövr ərzində Azərbaycanı dünya arenasında layiqincə təmsil etməsi, xalqın ona inamının nəticəsidir. Böyüklüyündən, kiçikliyindən asılı olmayaraq xalq hər bir zaman olduğu kimi, sentyabrın 27-dən başlayan əks-hücum əməliyyatları dövründə də Prezidentə inanaraq onun hər sözünün arxasında durdu. Xalqımız bir daha əmin oldu ki, cənab İlham Əliyev hansı məqamda nəyi, necə etməyi bilir və istər danışıqlar masasında, istərsə də hərb meydanında bütün addımlarını ən xırda detalınadək hesablayaraq atır. Bütün xalq da dövlətimizin başçısının hər addımını alqışlayır, onun sözünə güvənir və hər gün əməli fəaliyyətinin şahidi olur. Dövlətimizin başçısı İlham Əliyev xalqa hər müraciətində işğal olunmuş yaşayış məntəqələrimizin adlarını açıqlayır, xalqımızı daha da qürurlandırır. Dünyanın harasında yaşamasından asılı olmayaraq hər bir azərbaycanlı cənab Prezident İlham Əliyevi ən əziz, doğma insanı bilir, hər gün xalqa etdiyi müraciətlə onu evlərinin, ocaqlarının ən arzuolunan insanı kimi səbirsizlə gözləyir. Azərbaycan xalqının qeyrətli, mərd oğlu, sözünün ağası olan dövlət başçımız İlham Əliyevlə fəxr edirik. Qarabağ Azərbaycandır! Qələbə bizimlədir!"

Bəxtiyar Umarlı
Milli.Az